વ્યાજદરો વધવાને કારણે ઉદ્યોગનો વિકાસ રૂંધાશે

 

આરબીઆઈ દ્વારા કરવામાં આવેલા વ્યાજદરને કારણે વિકાસદર ઉપર તેની વિપરીત અસર પડશે તેવી ભીતિ ઉદ્યોગજગત દ્વારા વ્યક્ત કરવામાં આવી છે. આ ઉપરાંત બેન્કિંગ જગત, ઓટો ક્ષેત્ર અને હાઉસિંગ ક્ષેત્રના અગ્રણીઓએ પણ એવો ભય વ્યક્ત કર્યો છે કે આની વિપરીત અસર તમામ ક્ષેત્રો ઉપર પડશે.

ફિક્કીની ફાયનાન્સ કમિટીના ચેરમેન ઉદયન બોઝે આ અંગે જણાવ્યું હતું કે વ્યાજદરમાં વધારાને કારણે ઉત્પાદન કિંમતમાં વધારો થશે જેના કારણે વિકાસદરમાં ઘટાડો થવાની શક્યતા છે. આના કારણે ચીજવસ્તુઓની કિંમતમાં પણ વધારો નોંધાશે.

એસોચેમના પ્રમુખ દિલીપ મોદીએ પણ જણાવ્યું હતું કે વ્યાજદરમાં સતત વધારો કરવામાં આવ્યો હોવા છતાં પણ ફુગાવો કાબૂમાં નથી આવતો પરંતુ ઉત્પાદન, ભંડોળ એકત્રિકરણની કિંમતમાં વધારો થવાને કારણે નકારાત્મક સેન્ટિમેન્ટમાં વધારો થઈ રહ્યો છે.
આઈસીઆઈસીઆઈ બેન્કનાં વડાં ચંદા કોચરે જણાવ્યું હતું કે સ્વાભાવિક છે કે વ્યાજદરમાં કરવામાં આવેલો વધારો ગ્રાહકો ઉપર લાદવામાં આવશે.

યુનિયન બેન્ક ઓફ ઇન્ડિયાના ચેરમેન એમ. વી. નાયરે જણાવ્યું હતું કે આરબીઆઈ દ્વારા લેવામાં આવેલું પગલું અપેક્ષિત છે કારણ કે ફુગાવો વિકાસ સામે મોટો ખતરો છે. હાઉસિંગ ક્ષેત્રના સંગઠન મંડળોએ પણ એવો ભય સેવ્યો છે કે વ્યાજદરમાં વધારાના કારણે મકાનની કિંમતમાં ૫થી ૧૦ ટકાનો વધારો થવાની શક્યતા રહેલી છે.

કન્ફેડરેશન ઓફ રિયલ એસ્ટેટ ડેવલપર્સ એસોસિયેશન ઓફ ઇન્ડિયા (ક્રેડાઇ)ના ચેરમેન પ્રદીપ જૈને જણાવ્યું હતું કે વ્યાજદરમાં કરવામાં આવેલા વધારાના કારણે આગામી ૩થી ૬ માસ દરમિયાન દેશમાં મકાનોની કિંમતમાં ૫થી ૧૦ ટકાનો વધારો થવાની શક્યતા રહેલી છે. ક્રેડાઇના પ્રેસિડેન્ટે પણ જણાવ્યું હતું કે વ્યાજદરમાં વધારાના કારણે ફુગાવામાં ઘટાડો થવાના બદલે વધારો થતો હોય તેમ મને લાગી રહ્યું છે. તો બીજી તરફ ઓટોમોબાઇલ ક્ષેત્રના અગ્રણીઓએ પણ એવી ભીતિ વ્યક્ત કરી છે કે આ પગલાંને કારણે માગમાં ઘટાડો થશે. આ અંગે પ્રતિક્રિયા આપતા મહિન્દ્રા એન્ડ મહિન્દ્રાના પ્રેસિડેન્ટ પવન ગોએન્કાએ જણાવ્યું હતું કે આરબીઆઈનાં આ પગલાંને કારણે ઓટો ઉદ્યોગ ઉપર નકારાત્મક અસર પડશે તેમાં કોઈ શંકાને સ્થાન નથી.