સોગાદથી કરો સંબંધની યાદગાર શરૂઆત

 

ભેટ જીવનમાં દરેક માટે એક સંભારણું છે તેથી જીવનસાથીને એવી ભેટ આપો કે તેના માટે એ સૌથી મૂલ્યવાન બની રહે અને જીવનમાં એ વસ્તુથી કીમતી બીજું કંઇ જ ન હોય.

કોઇ પણ વ્યક્તિને તમે કંઇ ભેટ આપો તો તેને આનંદ થાય છે. ત્યારે જેને તમે આજીવન સાથીદાર બનાવ્યા છે, તેમને જીવનપથની શરૂઆતના સમયમાં સંભારણારૂપે પ્રથમ ભેટ આપો તો એને કેટલો આનંદ થાય? દાંપત્યજીવનની શરૂઆતમાં એકબીજાને આપેલી પ્રથમ ભેટ યાદગાર બની રહે છે. સામાન્ય રીતે પ્રથમ વાર પતિને કંઇ ગિફ્ટ આપો તો તેમને સોનાની ચેન, રિંગ કે રિસ્ટવોચ આપો. જેથી એ કાયમ તેમની પાસે રહેશે અને તમારી યાદ અપાવતી રહેશે. તે જ્યારે પણ તમારાથી દૂર હશે તો તમારી આપેલી વસ્તુને જોઇને તમને યાદ કરશે.

ભેટ આપવાની વાત ફક્ત પત્ની તરફની રહેતી નથી પણ પતિએ પણ પત્નીને યાદગાર દિવસના સંભારણારૂપે કંઇક સુંદર ભેટ આપવી જોઇએ. જીવનભર સાથ રહેવાનું વચન તો તમે એકબીજાને આપશો પણ તેના પ્રતિકરૂપે મળેલી વસ્તુ આ દિવસે વધારે મહત્વની બની રહેશે. પતિ સોનાની ચેન, રિંગ, પાયલ, બુટ્ટી વગેરે આપી શકે. આ રીતે સંબંધની શરૂઆત ભેટ આપીને કરી શકાય છે.