ફાઇબર્સથી થતા ફાયદા

 

ફાઇબર્સથી શરીરને અનેક લાભ થાય છે. જે છાલવાળા ફળ, લીલા શાકભાજીમાંથી મળે છે.

ટિનપેક ફુડ ખરીદો ત્યારે પેક પર ફાઇબર્સનું પ્રમાણ ચકાસીને ખરીદો. જેથી મહત્તમ ફાઇબર્સવાળો ખોરાક મળી રહે.

શરીર માટે જેટલા જરૂરી વિટામિન, પ્રોટીન, કાર્બોહાઇડ્રેસ છે એટલા જ જરૂરી ફાઇબર્સ છે. ડાયટરી ફાઇબર્સ એટલે એવો ખોરાક જેમાં કેલેરી હોતી નથી. તે આંતરડામાં જઇને ખોરાક ખાધાનો સંતોષ આપે છે. તેનાથી પેટ ભરાયાનો સંતોષ થાય છે અને લાંબા સમય સુધી ભૂખ લાગતી નથી.

વધુ ફાઇબરવાળો ખોરાક ખાવાના ફાયદા ઘણા છે. તેનાથી ડાયાબીટિસ કંટ્રોલમાં રહે છે. વધુ કોલેસ્ટેરોલના દર્દીઓને ફાઇબરવાળો ખોરાક કોલેસ્ટેરોલનું નિયમન કરે છે. આંતરડાના કેન્સર, કબજિયાતને દૂર રાખવા માટે ફાઇબર્સ લેવા આવશ્યક છે. વધુ પડતું વજન ધરાવનારા લોકો પણ જો ફાઇબર્સયુક્ત ખોરાક લે તો વજન વધતું અટકે છે અને વજન ઘટાડવા ઇચ્છતાં હોય તો ફાઇબર્સથી વજન ઝડપથી ઘટે છે. ફાઇબર્સવાળો ખોરાક નાના આંતરડામાંથી કોલોનમાં થઇને શરીરની બહાર નીકળી જાય છે અને કોલોનને હેલ્ધી રાખે છે. માટે જ ફાઇબર્સને કુદરતી સ્ક્રબર્સ કહેવામાં આવે છે. જે આંતરડાંને સાફ કરવાનું કામ કરે છે. ફાઇબર્સ આખા અનાજ, જાડા લોટ, શાકભાજી અને ફળફળાદિ તેમ જ સૂકા મેવામાંથી ભરપૂર પ્રમાણમાં મળે છે.

હાઇ ફાઇબરવાળો ખોરાક ખાવાથી અનેક રોગ દૂર રહે છે. જેમ કે, ઇનસોલ્યુએબલ ફાઇબર્સવાળો ખોરાક એટલે શાકભાજી, જાડો લોટ વગેરે ખાવાથી કોલોન કેન્સરથી દૂર રહેવાય છે. સોલ્યુએબલ ફાઇબર એટલે કે ફળફળાદિ, કઠોળ, ડ્રાય ફ્રુટ લેવાથી સ્ટ્રોકને અટકાવે છે, હાઇ કોલેસ્ટેરોલમાં ફાયદો કરે છે. સોલ્યુએબલ ફાઇબર્સ ઓગળીને આંતરડામાં એક જાતની જેલ ઉત્પન્ન કરે છે. આ જેલ શરીરમાં શર્કરાનું ઉત્પાદન ઓછું કરી બ્લડ ગ્લુકોઝ લેવલ જાળવે છે.

આ જેલ કબજિયાત દૂર કરી હરસ-મસા થતા અટકાવે છે. વ્યક્તિએ રોજિંદા ખોરાકમાં ૨૦થી ૩૫ ગ્રામ ફાઇબર્સ લેવા જોઇએ. જ્યારે વધુ ફાઇબર્સવાળો ખોરાક લો ત્યારે પાણી પણ વધુ પીવું જરૂરી છે નહીંતર કબજિયાત અથવા ગેસ થઇ શકે છે. ફાઇબર્સનો ફાયદો મેળવવા માટે ફળેને છાલસહિત ખાવા તેમ જ જયૂસને બદલે સમારીને ખાવા. જેથી તેના ફાઇબર્સ જળવાઇ રહે, શાકભાજીનો ઉપયોગ વધારવો જોઇએ.