‘આ માસૂમ બાળકીએ ખૂબ મ્હેણાં સાંભળવા પડતા હતા, પણ હવે...’

કોની લોય્ડને જન્મની સાથે જ નાક ઉપર ઘાટુ લાલ નિશાન હતું

કોનીએ પોતાના આસપાસના બાળકો અને લોકોમાં ઉપહાસનું કારણ બનવુ પડતુ હતું

આ બાળકીએ 3 વર્ષ સુધી પોતાના દોસ્તો અને સમાજના મ્હેણા સાંભળવા પડ્યા અને ઉપહાસનું કારણ પણ બનવુ પડ્યુ. પરંતુ હવે તે એક સામાન્ય છોકરીની જેમ દેખાઈ રહી છે. સ્લાવ, બર્કશાયરમાં રહેતી નાનકડી બાળકી કોની લોય્ડને જન્મની સાથે જ નાક ઉપર ઘાટુ લાલ નિશાન હતું, જેના કારણે તેનું નાક જોકર જેવુ લાગતુ હતું. આ સમસ્યાના કારણે કોનીએ પોતાના આસપાસના બાળકો અને લોકોમાં ઉપહાસનું કારણ બનવુ પડતુ હતું.

જો કે હવે ડોક્ટરોએ સર્જરીના માધ્યમથી તેના નાક ઉપર બનેલા આ નિશાનને હટાવી દીધુ છે. વાસ્તવમાં આ નિશાન એક નાનકડા ટ્યુમરના કારણે થયુ હતું અને ધીમે ધીમે તે ફેલાઈ રહ્યુ હતુ. આશરે સાડા 3 કલાક સુધી ચાલેલા ઓપરેશન પછી ડોક્ટરોએ તેનું નાક એકદમ પરફેક્ટ બનાવી આપ્યું છે.

કોનીની માએ જણાવ્યુ હતું કે જ્યારે તે જન્મી ત્યારે તેના નાક પર સામાન્ય નિશાની હતી, પરંતુ સમયની સાથે તે વધતી ગઈ અને વધીને 4 સે.મી. જેટલી પહોળી થઈ ગઈ. ડોક્ટરોએ 26 અઠવાડિયા સુધી તેના નાકનું નીરિક્ષણ કર્યું અને પછી ઓપરેશન કર્યું. હવે કોની સંપૂર્ણપણે બરાબર છે.