“મોંઘવારીથી જનતા છે ત્રસ્ત, પ્રધાનો ચલાવી રહ્યા છે કરોડોની લૂંટ"

-લોકસભામાં ભ્રષ્ટાચારના મુદ્દે ચર્ચાની વિપક્ષની માગણી
-વિપક્ષના હોબાળા બાદ લોકસભા અને રાજ્યસભાની કાર્યવાહી એક કલાક માટે સ્થગિત કરવી પડી
નવી દિલ્હીઃ મંગળવારે લોકસભાની કાર્યવાહી શરૂ થતાની સાથે જ વિરોધ પક્ષના નેતા સુષ્મા સ્વરાજે ભ્રષ્ટાચારના મુદ્દે ચર્ચાની માગણી કરતા સરકાર પર તીખા આક્ષેપોનો મારો શરૂ કરી દીધો હતો. સ્વરાજે જણાવ્યું હતું કે એક તરફ જનતા મોંઘવારીથી ત્રસ્ત છે અને સરકારના પ્રધાનો કરોડોની લૂંટ ચલાવી રહ્યા છે. સ્વરાજે એકપછી એક બહાર આવેલા કૌભાંડનો ઉલ્લેખ કરતા જણાવ્યું હતું કે આદર્શ કૌભાંડ શમે એ પહેલા ટુ-જી સ્કેમ બહાર આવ્યું અને એ શમે એ પહેલા એર ઈન્ડિયાનું કૌભાંડ અને બાદમાં કે-જી બેસિન કૌભાંડ બહાર આવ્યું. સ્વરાજે જણાવ્યું હતું કે અણ્ણા હજારેનું આંદોલન મોંઘવારી અને ભ્રષ્ટાચારથી ત્રસ્ત જનતાના આક્રોશનું પરિણામ છે.

બાદમાં લોકસભામાં વિરોધ પક્ષનો હોબાળો વધી જતા સ્પીકરને કાર્યવાહી સ્થગિત કરવાની ફરજ પડી હતી. અગાઉ રાજ્યસભાની કાર્યવાહી પણ વિપક્ષના હોબાળાને કારણે અટકાવી દેવી પડી હતી. અગાઉ એવી વાત આવી હતી કે લોકપાલ મુદ્દે વડાપ્રધાન આજે સંસદમાં નિવેદન આપશે પણ બાદમાં સરકાર દ્વારા એવી સ્પષ્ટતા કરવામાં આવી હતી કે વડાપ્રધાન આજે નિવેદન આપશે નહીં. આ તરફ અણ્ણ હજારેના સમર્થકો દેખાવો કરે એવી શક્યતાને પગલે કેન્દ્રીય ગૃહ પ્રધાન ચિદમ્બરમના ઘરની સુરક્ષા વધારી દેવામાં આવી હતી.