80 ડોલર માટે બ્રિટિશ સૈનિકને બોમ્બથી ઉડાવી દીધો!

 14 વર્ષના છોકરાને ગાજર બતાવી આતંકવાદીઓ ફરી ગયા યુવકને આ કામ બદલ 80 ડોલર આપવાનું કહેવામાં આવ્યુ હતું
એક અફઘાની યુવકે 80 ડોલર મેળવવાની લાલચમાં બ્રિટિશ સેનાના એક જવાનને બોમ્બથી ઉડાવી દીધો. મીડિયા રીપોર્ટ પ્રમાણે યુવકને આ કામ બદલ 80 ડોલર આપવાનું કહેવામાં આવ્યુ હતું. ડોલરની લાલચમાં આ 14 વર્ષના છોકરાએ સડકના કિનારે બોમ્બ લગાવી દીધો હતો, જેના ઝપાટામાં આવીને સ્ટીફન કર્લે (26 વર્ષ) નામના અંગ્રેજ સૈનિકનું મોત થયુ હતું.

કર્લે પાછલા વર્ષના મે માસમાં હેલમંડ પ્રાંતમાં એક પેટ્રોલિંગ ટીમનું નેતૃત્વ કરી રહ્યો હતો. પેટ્રોલિંગ દરમિયાન જ તેની હત્યા કરવામાં આવી હતી. આ દુષ્કૃત્યને અંજામ આપ્યા પછી આગા વલી નામનો આ યુવક તાલીબાની આતંકવાદીઓ પાસે પોતાના પુરસ્કારની રકમ માંગવા ગયા તો તેઓ પોતાની વાત પરથી ફરી ગયા.

આતંકવાદીઓએ એવું કહીને વાત ઉડાવી દીધી કે તેણે ડોલર માટે નહીં પણ ધાર્મિક કારણોને માન આપતા આવું કામ કરવું જોઇએ. પોતે છેતરાયો છે તેવું ખબર પડતા તેણે આ વાત પિતાને કરી અને તેના પિતાએ પોલીસને આ વાતની બાતમી આપી.