ATMમાં પૂરાયો યુવક, પોલીસને ગઈ શંકાને ખૂલ્યું ચોંકાવનારું રહસ્ય

 

 

મુંબઇ પોલીસના અધિકારીઓ ત્યારે અચંબામાં મુકાઇ ગયા જ્યારે તેમણે એક વ્યક્તિને ભારતીય ક્રિકેટ ટીમના માસ્ટર બ્લાસ્ટર સચિન તેંન્ડુલકરના ડેબિટ કાર્ડ સાથે એક વ્યક્તિને એટીએમમાંથી પકડી પાડ્યો હતો. ભારત માતા સિનેમા પાસે આવેલા એચએસબીસીના એક એટીએમમાં એક વ્યક્તિ જરૂર કરતાં વધારે સમય રોકાતાં પોલીસને શંકા ગઇ હતી. જ્યારે પોલીસે શંકાના આધારે તે વ્યક્તિને પકડ્યો અને તેની જડતી લીધી ત્યારે જાણવાં મળ્યું કે તેની પાસે સચીન તેંડુલકરનું ડેબિટ કાર્ડ હતું.

-એક વ્યક્તિ જરૂર કરતાં વધારે સમય રોકાતાં પોલીસને શંકા ગઇ હતી

-ડેબિટ કાર્ડ ખરેખર માસ્ટર બ્લાસ્ટર સચિન તેંડુલકરનું છે કે બીજા કોઇ વ્યક્તિનું?

-નકલી દસ્તાવેજો તૈયાર કરાવીને બેંકમાંથી નકલી ડેબિટ કાર્ડ પ્રાપ્ત કર્યુ

હવે પોલીસ આ અંગે ઉંડી તપાસ કરી રહી છે કે શું આ ડેબિટ કાર્ડ ખરેખર માસ્ટર બ્લાસ્ટર સચિન તેંડુલકરનું છે કે બીજા કોઇ વ્યક્તિનું?  આખરે સચિનનું ડેબિટ કાર્ડ આ વ્યક્તિ પાસે આવ્યું ક્યાંથી? આ અંગે તપાસ ચાલી રહી છે. પોલીસને શંકા છે કે, આ વ્યક્તિએ સચિન તેંડુલકરના નકલી દસ્તાવેજો તૈયાર કરાવીને બેંકમાંથી નકલી ડેબિટ કાર્ડ પ્રાપ્ત કર્યુ છે. તપાસ કર્તાઓએ સચિનના ડેબિટ કાર્ડની સાથે સાથે બીજી ચાર બેન્કોના ડેબિટ કાર્ડ પણ આ શખ્સ પાસેથી પ્રાપ્ત કર્યા છે.

ભોઇવાડા પોલીસ સ્ટેશનના સિનિયર ઇન્સ્પેક્ટરે જણાવ્યું હતું કે, “ કોટક મહિન્દ્રાના ડેબિટ કાર્ડ ઉપર સચિન તેંડુલકરનું નામ લખ્યું હતું. આ અંગે અમે બેન્ક પાસેથી જાણકારી માંગી છે કે શું આ કાર્ડ ખરેખર સચિનનું છે કે અન્ય કોઇ વ્યક્તિનું? બેન્ક પાસેથી જાણકારી મળ્યાં બાદ અમે સચિનનો સંપર્ક કરીશું. બીજી બાજુ અમે ખોવાયેલા કાર્ડ અંગેની નોંધાવેલી ફરિયાદને પણ તપાસી રહ્યાં છીએ.”

પોલીસને પકડાયેલા શખ્શ દૂધવાલા પાસેથી નકલી ડ્રાઇવિંગ લાઇસન્સ પણ મળી આપ્યું હતું. શરૂઆતમાં દૂધવાલાએ દાવો કર્યો હતો કે તેને બસ સ્ટેન્ટ પરથી આ કાર્ડ મળ્યાં હતા જોકે પાછળથી તેણે જણાવ્યું હતું કે તેને તાત્કાલિક પૈસાની જરૂર હોવાથી નકલી કાર્ડ કઢાવ્યાં હતા. પોલીસ વધુ તપાસ કરી રહી છે કે પકડાયેલા ડેબિટ કાર્ડ મોટા પાયે ચાલતાં રેકેટનો એક ભાગ તો નથીને.