તાતા મોટર્સનું સાણંદમાં ફરીથી ઉત્પાદન શરૂ

 

સ્થાનિક સ્તરે માગ ઘટી હોવાને કારણે તાતાએ તેના પૂણે અને સાણંદ ખાતે આવેલા ઉત્પાદન એકમોમાં હંગામી ધોરણે પેસેન્જર વાહનો બનાવવાનું કામકાજ બંધ કરી દીધું હતું પરંતુ હવે તેણે ઉત્પાદન ફરી શરૂ કરી દીધું છે તેમ કંપનીએ જણાવ્યું હતું.

કંપની દ્વારા જાહેર કરવામાં આવેલાં એક નિવેદનમાં જણાવવામાં આવ્યું હતું કે ૧૫ દિવસ સુધી બંધ રખાયા બાદ તાતાના સાણંદ ખાતેના પ્લાન્ટમાં ઉત્પાદન ફરી શરૂ કરી દેવામાં આવ્યું છે. સમારકામ અને ઉત્પાદનને વ્યવસ્થિત કરવા માટે પ્લાન્ટ થોડા સમય માટે બંધ રાખવામાં આવ્યો હતો. તાતા મોટર્સના પ્રવકતાનો સંપર્ક સાધવામાં આવતા તેમણે જણાવ્યું હતું કે સાણંદની જેમ પૂણે ખાતે આવેલા એકમમાં પણ સાત દિવસ માટે ઉત્પાદન સ્થગિત કરી દેવામાં આવ્યું હતું, જોકે તેમણે એ નહોતું જણાવ્યું કે કંપનીએ તેનાં ઉત્પાદનમાં કેટલી માત્રામાં કાપ મૂક્યો છે. પ્રવકતાએ જણાવ્યું હતું કે પૂણે, પાર્થનગર, જમશેદપુર અને લખનઉ ખાતે આવેલા એકમમાં વેપારી વાહનોનું ઉત્પાદન રાબેતા મુજબ ચાલી રહ્યું છે.

તાજેતરમાં જ સોસાયટી ઓફ ઇન્ડિયન ઓટોમોબાઇલ મેન્યુફેકચરર્સ (એસઆઈએએમ)એ જણાવ્યું હતું કે જુલાઈ માસ દરમિયાન તાતા મોટર્સનું પેસેન્જર વાહનોનું ઉત્પાદન ગત વર્ષના સમાન સમયગાળાની સરખામણીએ ૨૧.૬૩ ટકા ઘટીને ૨૮,૩૪૪ એકમોનું થઈ જવા પામ્યું હતું. આ સમયગાળા દરમિયાન સ્થાનિક બજારમાં કંપનીનું વેચાણ ૩૨.૬૪ ટકા ઘટીને ૨૨,૦૧૧ એકમનું નોંધાયું હતું. સાણંદ ખાતે તાતા નેનો અને પૂણે ખાતે તે ઇન્ડિકા અને ઇન્ડિકાનું ઉત્પાદન કરે છે.