શક્કરટેટીનું ભિલોડામાં ૧૦૦ હેક્ટરમાં વાવેતર

વહેલી સવારે ભરાતા બજારમાં ઉચ્ચક વેચાણ કરતા ખેડૂતો

ઉનાળાના અમૃત ફળ તરીકે ઓળખાતી કેરી પછી શક્કરટેટીને લોકો આજે પણ યાદ કરે છે. ભિલોડા પાસેની હાથમતી નદી પર બંધાયેલા ઇન્દ્રાસી ડેમમાંથી પાણીની સપાટી ઘટ્યા બાદ કેટલાક ખેડૂત પરિવારોએ અંદાજે ૧૦૦ હેક્ટરથી વધુ જમીનમાં અંદાજે ૨૦ મણથી વધુ શક્કરટેટીનું બિયારણની વાવણી કરી હતી. ત્યારબાદ ડેમના પાણીમાંથી સિંચાઇ કરીને ટેટી પકવવામાં આવે છે. જોકે શક્કરટેટીને પકવવા માટે કોઇપણ જાતની દવા કે કાર્બન જેવા પદાર્થ વાપરવામાં આવતા નથી. શક્કરટેટી એ કુદરતી રીતે વેલા પરજ પાકે છે.

ત્યારબાદ આ ખેડૂતો શક્કરટેટીના વેચાણ માટે તેને નાના વાહનોમાં ભરીને વહેલી સવારે ભિલોડાના બજારમાં આવી જાય છે. ત્યારબાદ તેને વેપારીઓ હરાજી કરીને શક્કરટેટી ખરીદે છે. આ અંગે જયંતિભાઇ પરમાર અને સગર મહેશભાઇ મણીલાલ નામના વેપારીનું કહેવું છેકે અમે આ ટેટી ઉચ્ચક ખરીદીને તેના પ્રતિ એક કિલોના ૧૫ રૂપિયાના ભાવે છુટક વેચાણ કરવા માટે નાના વેપારીઓને આપીએ છીએ. જેના કારણે ખેડૂત પરિવારો, નાના વેપારીઓ, વાહનવાળાઓને રોજી રોટી મળી રહે છે.

ભિલોડાની ડેમસાઇટમાં પાકતી આ શક્કરટેટી સ્વાદમાં મધ્યમ હોવા છતાં તે અમદાવાદ, સુરત, પાટણ, નડિયાદ સહિતના સ્થળે વેચાણ માટે વેપારીઓ લઇ જાય છે. જોકે એ કહેવું પડે કે પ્રાંતજિ તાલુકાના લાકરોડા પાસેની સાબરમતી નદીમાં પાકતી લીલી શક્કરટેટીનો સ્વાદ આજે રસિયાઓને મળતો નથી. છતાં અન્ય સ્થળે પાકતી શક્કરટેટી આરોગીને સંતોષ માનવો પડે છે.