નિષ્ફળતાથી નાસીપાસ ન થવું

શું માણસના ભવિષ્યનો આધાર તેના પરીક્ષાના પરિણામ ઉપર જ આધારિત છે? દરેક વખતે આનો જવાબ હા જ હોય તેવું જરૂરી નથી. એવું નથી કે સારાં પરિણામનું કંઇ મહત્વ નથી, પરંતુ નબળા પરિણામથી નાસીપાસ થવાની પણ જરૂર નથી. જરૂર છે પોતાના પર વિશ્વાસની અને મહેનત કરવાની. હું એવા લોકોને જાણું છું જેમની જિંદગી નબળાં પરિણામોમાંથી પસાર થઇ હતી, પરંતુ તેમની આજ નબળી નથી.

એક મિત્રના સંબંધીના દીકરાને બારમા ધોરણમાં સારા માકર્સ આવ્યા નહીં કારણ ભણવામાં રુચિ જ નહોતી. તેણે બી.એસસી.માં એડમિશન લીધું. ત્યાર બાદ તેને ભણવાનું ગમવા માંડ્યું. તે છોકરો બી.એસસી.માં બધા વર્ષમાં પ્રથમ વર્ગમાં પાસ થયો. તેને તેના આધારે આગળ ભણવા માટે યુએસએની સ્કોલરશિપ મળી અને તે પીએચ.ડી. માટે યુએસએ ગયો. આજે તે યુએસએમાં સારી યુનિવર્સિટીમાં પ્રોફેસર છે.

બીજા એક મિત્રનો દીકરો ભણવામાં હોશિયાર હતો. ડોક્ટર પિતાને દીકરો ડોક્ટર બને તેવી ઇચ્છા હતી. બારમા ધોરણમાં ધાર્યા માકર્સ આવ્યા નહીં. ડોક્ટર મિત્રએ ડોનેશન આપવાની તૈયારી રાખી હતી, પરંતુ છોકરાએ બી.સી.એ. કરવાનું નક્કી કર્યું. શરૂઆતમાં પિતાને ન ગમ્યું, પરંતુ બી.સી.એ.માં સારા માકર્સ મેળવીને એણે એમ.સી.એ. કર્યું. એમ.સી.એ. થયેલા દીકરાને પીએચ.ડી. કરવા માટે અમેરિકાની યુનિવર્સિટીએ હા પાડી અને તે અંગે અમેરિકન કોન્સ્યુલેટે વિઝા પર સિક્કો મારી દીધો, ત્યારે પિતાની ખુશીનો પાર ન રહ્યો. આ દીકરો હાલ અમેરિકામાં સારી કંપનીમાં નોકરી કરે છે.

આ જ રીતે એક હોશિયાર છોકરો થોડા માર્કસ માટે મેડિકલ લાઇનમાં પ્રવેશથી વંચિત રહી ગયો. તેણે પણ બીબીએમાં પ્રવેશ લીધો. તે સાથે તેણે સી.એ.નો અભ્યાસ શરૂ કર્યો. મૂળ વિજ્ઞાનનો વિદ્યાર્થી પણ હોશિયાર હોવાથી તેને બહુ તકલીફ ન પડી. બી.બી.એ. પૂરું કરી એમ.બી.એ. ચાલુ કર્યું, પરંતુ એમસીએની પરીક્ષા પહેલાં તેણે સી.એ.ની પરીક્ષા પ્રથમ પ્રયત્નમાં પાસ કરી. અત્યારે તેને મહિને પચાસ હજારની નોકરીની ઓફર છે. આનો મતલબ એ છે કે સફળતા મેળવવા માટે ક્યારેક નસીબે ઓછી યારી આપી હોય તો નાસીપાસ થવું નહીં. એ કદાચ આગળની સીડી માટેનું પગથિયું પણ હોઇ શકે.