અવનવાં થીમબેઝડ રિસેપ્શન

લગ્ન પ્રસંગનું મહત્વ અદકેરું છે. તેથી જ તો તેને તહેવારની જેમ ઊજવવામાં આવે છે. આની ઉજવણીમાં કોઇ કસર રાખવામાં આવતી નથી. લગ્નપ્રસંગ લોકોની સ્મૃતિમાં વર્ષો સુધી રહે તે માટે લગ્નમાં વિવિધ થીમનું આયોજન કરવામાં આવે છે. અરે, હવે તો થીમબેઝ રિસેપ્શનનું પણ ભવ્ય આયોજન થાય છે. આ વર્ષે રિસેપ્શનમાં ક્યાં પ્રકારની થીમ ઇન છે એ અંગે ‘આઇડિયા ઇવેન્ટ’ના સમીર વૈદ્ય પાસેથી જાણીએ. જેથી ઘરમાં કે સ્નેહીજનોમાં રિસેપ્શનનું આયોજન કરવામાં સરળતા રહે. સમીરભાઇ કહે છે, ‘લગ્ન અને ખાસ કરીને રિસેપ્શનને યાદગાર સંભારણું બનાવવા માટે થીમ બેઝ ડેકોરેશન કરવાની માંગ દિવસે દિવસે વધી રહી છે. દર વર્ષે લોકોને કંઇક નવું આપી શકાય એ માટે અમે પોતે પણ નવું નવું ક્રિએટ કરતાં રહીએ છીએ. લેટેસ્ટ પોપ્યુલર થીમ આ પ્રમાણે છે.

આઇસ એન્ડ ફાયર: આ થીમમાં એન્ટ્રી ગેટ બરફની ગુફા જેવો બનાવવામાં આવે છે. જાણે બરફની ગુફામાં પ્રવેશતાં હો એવું લાગે. તેમાં થોડા થોડા અંતરે મશાલ લગાવવામાં આવે છે. સ્ટેજ બરફનું હોય અને એમાં અગ્નિની જવાળાની ઇફેકટ આપવામાં આવે છે.

પીકોક થીમ: મોરના પીંછા જેવા કલર કોમ્બિનેશન મુજબ આખું સ્ટેજ બને છે. ચારે બાજુ મોર જ દેખાય એવો દેખાવ ઊભો કરવામાં આવે છે. વર-વધૂના પોશાક પણ પીકોક કલરના હોય છે. પીકોક થીમમાં લાઇટિંગ ઇફેકટ સાથે વિવિધ ફુલથી સજાવટ કરાય છે.

ક્રિસ્ટલ થીમ: અત્યારે ક્રિસ્ટલની ડિમાન્ડ વધારે છે. આ થીમમાં ફૂલના સ્થાને લાઇટિંગને પ્રાધાન્ય આપવામાં આવે છે. ઝુમ્મરનું સ્ટેજ બનાવી તેની ચોતરફ લાઇટિંગ કરવામાં આવે છે. નવવધૂ પણ ડાયમંડ વર્કવાળી સાડી પહેરે છે.

જોધા-અકબર થીમ: જોધા-અકબર એ બાદશાહી થીમ હોવાથી આમાં મહેલ જેવો સ્ટેજ બને છે. વર-વધૂના પોશાક મુગલાઇ જેવા હોય છે. વરને સ્ટેજ સુધી હાથી ઉપર બેસાડી લાવવામાં આવે છે. જ્યારે કન્યાને ડોલીમાં બેસાડીને લવાય છે. આ ઉપરાંત આજકાલ રાજસ્થાની થીમ અને ઇજિપ્ત થીમ ઇન છે. યજમાનની ઇચ્છા પ્રમાણે થીમ ઊભી કરવામાં આવે છે, તો બે જુદી જુદી થીમનો કન્સેપ્ટ ભેગો કરી ઘણી વખત મિક્સ એન્ડ મેચ થીમ પણ કરવામાં આવે છે. આ રીતે હવે લોકો થીમબેઝડ લગ્ન અને રિસેપ્શનનું આયોજન કરી જીવનમાં એક વાર આવતા આ પ્રસંગને આજીવન યાદગાર બનાવે છે.