આંખની કાળજી જરૂરી

 

ઉનાળામાં આંખના અમૂલ્ય રતનની કાળજી રાખવી ખાસ જરૂરી છે કેમ કે ગરમીમાં આંખોમાં બળતરા થવી, આંખ લાલ થઇ જવી જેવી સમસ્યાઓ પરેશાન કરે છે.

ગરમીમાં આંખને થાક વધારે લાગે છે અને તાપના કારણે આંખમાં બળતરા પણ વધારે થતી હોય છે. આ ઉનાળામાં આંખની કાળજી કેવી રીતે રાખશો અને કેવા પ્રકારનો મેકઅપ કરવો જોઇએ તે જાણવું જરૂરી છે.તાપમાં વધારે ફરવાનું થતું હોય અથવા તાપના કારણે આંખને થાક વધારે લાગતો હોય કે સોજો આવી જતો હોય તો સોજો આવેલા ભાગ પર કાકડીના પતીકાં કરીને તે પતીકાં મૂકવા. આ ઉપરાંત બટાકાંને પણ ગોળ પતીકાં સમારીને મૂકી શકાય.

તમે ગમે તેટલો મેકઅપ કરો પણ પરસેવો થાય એટલે મેકએપ તો ખરાબ થઇ જાય છે અને સાથે આંખ પણ ખરાબ થાય છે. કાજળ લગાવ્યું હોય તો તે વધારે પ્રમાણમાં પ્રસરી તો નહી જાય ને તેની બીક રહે છે અને ન લગાવ્યું હોય તો આંખ ખરાબ દેખાય છે, તેવી મૂંઝવણ થાય. તેથી ઉનાળામાં કાજળ પેXન્સલનો ઉપયોગ કરવો.જો રાત્રે કોઇ પાર્ટીમાં જવાનું હોય તો લાઇટ કલરનો આઇશેડો લગાવો.

ગરમીમાં આઇલાઇનરનો ઉપયોગ ટાળવો અને તેના બદલે મસ્કરાનો ઉપયોગ કરવો. વધારે તાપમાં હંમેશા ગોગલ્સ પહેરીને જ બહાર જવાનું રાખવું. સસ્તા અને ખરાબ ગુણવત્તાવાળા ગોગલ્સ ન ખરીદવા કારણ કે તેમાં લગાવેલા ગ્લાસની કવોલિટી સારી હોતી નથી અને તે આંખને નુકસાન પણ પહોંચાડી શકે છે.

તાપમાંથી આવ્યા બાદ ઠંડા પાણી વડે આંખને ધોઇ નાખો, જેથી આંખને ઠંડક મળશે અને વઘારે બળતરા થશે નહીં. જો વધારે તાપના કારણે આંખોની બળતરા ઓછી ન થતી હોય તો ઠંડા દૂધમાં રૂ પલાળીને તેને આંખ પર દસ મિનિટ સુધી મૂકી રાખો. આવું ચારથી પાંચ વાર કરવાથી આંખને ઠંડક મળશે અને ધીરે ધીરે બળતરાથથી ઓછી થઇ જશે.