શું મોદી બનાવશે ગુજરાતમાં દુબઈ-હોંગકોંગ જેવું શહેર?

- સૌથી વધુ ૩.૬૫ની એફએસઆઇને રાજ્ય સરકારની મંજુરી
- સાબરમતી કોતરોની સંપાદિત કરાયેલી ૬૭૩ એકર જમીનને રાજ્ય કેબિનેટની બહાલી
- સૌપ્રથમ રોડ, ગટર, પાણી, આઇટી કેબલ અને વીજળીની સુવિધા ઊભી કરાશે
મુખ્યમંત્રી નરેન્દ્ર મોદીના‘ડ્રીમ પ્રોજેક્ટ’ ગિફ્ટ સિટીમાં ગુજરાતના સ્થાપનાદિન ૧લી મે-’૧૧થી ઇન્ફ્રાસ્ટ્ર્કચરના પ્રોજેક્ટ્સ શરૂ કરવામાં આવી રહ્યા છે. સૌપ્રથમ ફોરલેન રોડ, ગટરલાઇન, પાણી, આઇ.ટી. કેબલ્સ તેમજ વીજળીની સુવિધાઓ ઊભી કરવામાં આવશે. અંદાજે રૂપિયા ૭૫ હજાર કરોડના બિઝનેસ હબમાં રાજ્ય સરકારે ૬૭૩ એકર જમીન સંપાદન કરી છે, જેને કેબિનેટે બહાલી આપી છે.

ગુજરાત ઇન્ટરનેશનલ ફાઇનાન્સ ટેક (ગિફ્ટ) સિટી સંયુક્ત સાહસ છે. ડિટેઇલ માસ્ટર પ્લાનમાં દુબઈ અને હોંગકોંગ જેવો કન્સેપ્ટ રાખવામાં આવ્યો છે. શહેરી વિકાસ વિભાગનાં સૂત્રોએ જણાવ્યું હતું કે, ગિફ્ટ સિટી માટે રાજ્ય સરકારે આઠ પ્રકારની મંજુરીઓ તાજેતરમાં મેળવી છે, જેમાં ગુડાના માસ્ટરપ્લાન, કેન્દ્રના સિવિલ એવિએશનનું કલીયરન્સ, પર્યાવરણીય કલીયરન્સ અને માઇક્રો ઝોનિંગનો સમાવેશ થાય છે. રાજ્ય સરકારે આ સિટીની ઇમારતો માટે સૌથી વધુ ૩.૬૫ની એફએસઆઇ જાહેર કરી છે. કેન્દ્ર સરકારે સેઝને મંજુરી આપી છે. વાઇબ્રન્ટ સમિટ-’૧૧માં આ સિટી માટે ૫૦ હજાર કરોડના એમઓયુ સાઇન કરાયા છે.

વિભાગના અધિકારીએ જણાવ્યું હતું કે, ઇન્ફ્રાસ્ટ્રક્ચરના ૨૦૦ કરોડનાં કામ માટે ટેન્ડર બહાર પાડવાની પ્રક્રિયા શરૂ કરવામાં આવી છે. અન્ય સુવિધાઓ ઊભી કરવા આમ તો ૭૦૦૦ કરોડનું બજેટ જોઈએ છે, પરંતુ આગામી ત્રણ વર્ષમાં ૧૦૦૦ કરોડ ખર્ચવાનું આયોજન છે. જમીનનો વિકાસ કરવા ગુડાને ૬૭૩ એકર જમીનનું એડવાન્સ પઝેશન આપી દેવામાં આવ્યું છે. હાલ કાચા રસ્તા અને જમીન સમથળનું કામ પૂર્ણ કરવામાં આવ્યું છે.

ગિફ્ટ સિટીમાં ટ્રાન્સપોટેંશન વ્યવસ્થાના ભાગરૂપે બીઆરટીએસના ફેઝ-૩ની મંજુરી અમદાવાદ મ્યુનિસપિલ કોર્પોરેશને આપી છે, જ્યારે એમઆરટીએસ માટે જીઆઇડીબીએ બહાલી આપી છે. સરકારે ભૂકંપરહિત બાંધકામ સહિત આ સિટી માટે ૧૧ જાતના અભ્યાસ રિપોર્ટ બનાવ્યા છે. સાબરમતીના વિશાળ ફલક ઉપર ગિફ્ટ સિટીને પાણીની જરૂરિયાત પૂરી પાડવા એક કિલોમીટર લાંબા અને સાત મીટર ઊંડા સમૃદ્ધિ સરોવરનું નિર્માણ પણ થઈ રહ્યું છે.