એક ગજબની ચાહત, તસવીરોમાં

રજનીકાન્તભાઇ તેમના કલેક્શનનું પ્રદર્શન યોજશે
અમદાવાદના રજનીકાન્તભાઇ ચૌહાણ સચિન તેન્ડુલકરના અનોખા ચાહક છે. તેમણે સચિનના જન્મથી લઇને અત્યાર સુધીની તેની જિંદગીના તમામ રેકોર્ડની નોંધ રાખી છે. આ નોંધ અને અન્ય યાદગારી ચીજોનું તેઓ ૧૮ ફેબ્રુઆરીના રોજ અમદાવાદમાં અંધજન મંડળ ખાતે પ્રદર્શન યોજશે.

સચિને પ્રથમ વખત હાથમાં બેટ પકડ્યું ત્યારથી લઇને આજ સુધી તેણે જેટલા રેકોર્ડ કર્યા છે તે તમામ રેકોર્ડ અને ન્યુઝપેપરના કટિંગ તેમણે સાચવી રાખ્યા છે. આ સિવાય તેમની પાસે અત્યાર સુધીના તમામ રેકોર્ડ પણ ઉપલબ્ધ છે. સચિનના જન્મથી લઇને વિવિધ સેલિબ્રિટી સાથેના ફોટો, તેના લગ્નના ફોટા, તેને મળેલા અચિવમેન્ટના ફોટો પણ આ કલેક્શનમાં છે.

આ વિશે રજનીકાન્તભાઇએ જણાવ્યું કે, હું છેલ્લા ૧૫ વર્ષથી આ કલેક્શન એકઠું કરી રહ્યો છું. મારે વર્લ્ડકપ પહેલાં મારી તમામ વસ્તુઓનું કલેક્શન કરીને તેનું પ્રદર્શન યોજવું છે. આ માટે હું છેલ્લા બે મહિનાથી દરરોજ ૧૦ કલાક મહેનત કરીને ડોકયુમેન્ટ તૈયાર કરી રહ્યો છું. તેમાં હું સચિનની સફળતા વિશે લખાણ લખું છું. આ સિવાય મારી પાસે વન-ડે રેકોર્ડ, ટેસ્ટ મેચ રેકોર્ડ, વર્લ્ડકપ રેકોર્ડ, સેન્ચ્યુરી વગેરે જેવા રેકોર્ડ વગેરેની માહિતી છે જેને એક પેજ પર લખી છે. તેમની પાસે સચિનના ૫૦૦થી પણ વધારે ફોટા અને ૧૫૦ જેટલા વિવિધ લખાણ છે.

સચિનના વ્યક્તિત્વથી ઇમ્પ્રેસ

સચિનના ચાહક બનવા વિશે રજનીકાન્તભાઇએ કહ્યું કે, ક્રિકેટર ઘણા બધાં છે પરંતુ સચિન ક્રિકેટમાં તો સારી રીતે રમી રહ્યો છે પરંતુ તેની સાથે-સાથે તે પોતે વ્યક્તિ તરીકે પણ અલગ ઓળખ ઊભી કરે છે. તેના વ્યક્તિત્વથી હું ઇમ્પ્રેસ થઇ ગયો છું. હું તેનો ચાહક છું પરંતુ મને તેને મળવાનો કોઇ ક્રેઝ નથી.