ઓસ્ટ્રેલિયામાં ભીષણ આગમાં 59 મકાનો બળીને ખાખ

 

>>બે વર્ષ પહેલા વિક્ટોરિયામાં લાગેલી આગમાં 173 લોકો હોમાયા હતાં
>>મકાન ગુમાવનારને સરકાર દ્વારા 3000 ડોલરની સહાય આપવામાં આવશે

પશ્ચિમ ઓસ્ટ્રેલિયામાં પર્થમાં ફાટી નીકળેલી આગમાં 59 ઘર નષ્ટ થઈ ગયા છે. આ વિસ્તારમાં રહેતા લોકોને સરકારે ઘર છોડીને જતાં રહેવાની અપીલ કરી છે. સમાચાર પત્ર ‘મોર્નિંગ હેરાલ્ડના’ જણાવ્યા પ્રમાણે ગયા અઠવાડિયે લાગેલી આગમાં અનેક મકાનો બળીને ખાખ થઈ ગયા છે. ત્યાર બાદ આ વિસ્તારમાં કુદરતી ઈમરજન્સી જાહેર કરી દેવામાં આવી છે.

નોંધનીય છે કે બે વર્ષ પહેલા દક્ષિણ પ્રાંત વિક્ટોરિયામાં લાગેલી આગમાં 173 લોકોના મોત થયા હતાં. રિપોર્ટના જણાવ્યા પ્રમાણે રવિવારે સવાર સુધી આગની ઝપટમાં 40 મકાનો આવી ગયા હતાં, ત્યાર બાદ આ સંખ્યા વધીને 59 સુધી પહોંચી ગઈ છે. હાલમાં આગની ઝપટમાં આવી ગયેલા વિસ્તારમાં આગ પર કાબૂ મેળવવાનો પ્રયાસ ચાલી રહ્યો છે.

આ વચ્ચે સરકાર દ્વારા મકાન ગુમાવનાર લોકો માટે 3000 ડોલરના વળતરની જાહેરાત કરવામાં આવી છે. તેમજ જેની સંપત્તિને ભારે નુકસાન થયું હોય તેને 1000 ડોલરના વળતરની જાહેરાત કરવામાં આવી છે.