ભારત-ઓસ્ટ્રેલિયા વચ્ચે આજે વર્લ્ડ કપની વોર્મઅપ મેચ

બેંગલોરના એમ. ચિન્નાસ્વામી સ્ટેડિયમ ખાતે બપોરે ૨.૩૦ કલાકે મેચ શરૂ થશે. બંને ટીમ એકબીજા પર દબાણ લાદવાના ઇરાદા સાથે મેદાને પડશે

વન-ડે ક્રિકેટ વર્લ્ડ કપમાં બાંગ્લાદેશ સામેની પ્રારંભિક મેચ રમતાં અગાઉ મહેન્દ્રસિંઘ ધોનીના ધુરંધરો રવિવારે અહીંના એમ. ચિન્નાસ્વામી સ્ટેડિયમ ખાતે રમાનારી વોર્મઅપ મેચમાં ઓસ્ટ્રેલિયન ટીમ સામે ટકરાશે. બંને ટીમ પોતપોતાના મહત્વના ખેલાડીઓની ઇજામાંથી બહાર આવી નથી તેને કારણે આ મેચ બંને ટીમના ખેલાડીઓ માટે ફિટેનસ ટેસ્ટ બની રહેશે.

મેચ બપોરે ૨.૩૦ કલાકે શરૂ થશે અને તેનું જીવંત પ્રસારણ ઇએસપીએનની સ્ટાર સ્પોર્ટ્સ અને સ્ટાર ક્રિકેટ ચેનલ પરથી કરાશે.

સેહવાગ અને યુવરાજના બુલંદ ઇરાદા : ગયા વર્ષે મોટાભાગની મેચમાં ઇજાથી પરેશાન રહેલો યુવરાજસિંઘ હવે સંપૂર્ણ ફિટ જણાય છે અને રન ફટકારવા માટે આતુર છે.

બીજી તરફ વીરેન્દ્ર સેહવાગ પણ ૫૦ ઓવર સુધી ટકી રહેવા માટે પ્રતબિદ્ધ બન્યો છે. આ બંને ઉપરાંત સચિન તેંડુલકર, ગૌતમ ગંભીર, યુસુફ પઠાણ અને વિરાટ કોહલી પણ ફોર્મમાં છે અને ઓસ્ટ્રેલિયન બોલરનો સામનો કરવા મક્કમ છે. ધોની છેલ્લા કેટલાક સમયથી ફોર્મમાં નથી.

રિકી પોન્ટિંગ પણ સક્ષમ છે

ઓસ્ટ્રેલિયન સુકાની રિકી પોન્ટિંગ પણ ભારત સામેની આ મેચને હળવાશથી લેશે નહીં. પોન્ટિંગ આ વર્લ્ડ કપ જીતીને પોતાની આગેવાની હેઠળ સળંગ ત્રીજો વર્લ્ડ કપ જીતવા આતુર છે. આ ગોલ્ડન તકનો લાભ લેવા તે હાલમાં તમામ ચીજ દાવ પર લગાડી દેવા માગે છે. આમેય ભારત સામેના મુકાબલાને ઓસ્ટ્રેલિયન ટીમ યુદ્ધ તરીકે ગણતી હોય છે.

વોર્મઅપ મેચનું પ્રસારણ

ઇએસપીએન, સ્ટાર સ્પોર્ટ્સ અને સ્ટાર ક્રિકેટ પરથી રવિવારે રમાનારી ભારત અને ઓસ્ટ્રેલિયા તથા એ પછીની ભારત અને ન્યૂઝીલેન્ડ વચ્ચેની વોર્મ અપ મેચનું પણ જીવંત પ્રસારણ થવાનું છે.