ભારતને વર્લ્ડકપ કોણ જીતાડશે: નસીબ કે જુસ્સો

ક્રિકેટનો મહાકુંભ શરૂ થઈ ગયો છે. ક્રિકેટપ્રેમીઓમાં લગભગ દોઢ મહિના સુધી કોના માથે તાજ આવશે તેના સિવાય બીજી કોઈ ચર્ચા જોવા નહીં મળે. ભારતની આશાઓ ઘણી ઊંચી છે. આપણી ટીમ આ વખતે વિશ્વકપની દાવેદાર દેખાઈ રહી છે.મહેન્દ્રસિંહ ધોનીની ટીમે છેલ્લા એક વર્ષમાં જે રમત દેખાડી છે તેને પરિણામે ક્રિકેટની આ સૌથી મોટી ટૂનૉમેન્ટમાં ફેવરિટ હોવાનો ખિતાબ સ્વાભાવિક રીતે જ મળી ગયો છે. જોકે આટલી મોટી ટૂનૉમેન્ટમાં દરેક ભવિષ્યવાણી જોખમવાળી હોય છે, પરંતુ જ્યારે આપણી ટીમ ફોર્મમાં હોય, વાતાવરણ ઘરેલું અને ટૂનૉમેન્ટનું ફોર્મેટ ટીમને અનુકૂળ હોય તથા વિરોધી ટીમો સંઘર્ષ કરતી જોવા મળતી હોય ત્યારે આશાઓ આપમેળે જ વધી જાય છે. ભારતનો ઇન્તજાર ૨૮ વર્ષ લાંબો થઈ ગયો છે. આઠ વર્ષ પહેલાં ટીમ આ મંજિલથી ફક્ત એક ડગલું દૂર રહી ગઈ હતી. તે વખતે ફાઈનલમાં સામે પક્ષે ઓસ્ટ્રેલિયાની ટીમ હતી, જે અજેય દેખાતી હતી. ઓસ્ટ્રેલિયાની ટીમ આજે ભલે મજબૂત ગણાતી હોય પરંતુ તેનો પહેલાં જેવો ભય રહ્યો નથી. આમ તો દક્ષિણ આફ્રિકાની ટીમ પણ મજબૂત છે પરંતુ તણાવના સમયે તે ઘૂંટણ ટેકવી દે છે.ઇંગ્લેન્ડની ટીમ પહેલાં કરતાં થોડી શક્તિશાળી બની છે અને પાકિસ્તાનની ટીમ પણ ઉલટફેર કરવાની ક્ષમતા ધરાવે છે. શ્રીલંકા પણ યજમાનીમાં ભાગીદાર છે. તેની તૈયારી પણ જોરદાર છે અને જીતવાનું જોશ ધરાવે છે. આથી ભારત માટે માર્ગ સરળ તો નથી જ, પરંતુ વિશ્વકપ જીતવો કંઈ સરળ કામ થોડું છે? ઈમરાન ખાને કહ્યું હતું કે વિશ્વકપ ઉઠાવવા માટે ફક્ત ટીમનું મજબૂત હોવું જ જરૂરી નથી, નસીબે પણ યારી આપવી જોઈએ. વાત સાચી જ છે. આપણા મિસ્ટર કૂલ એટલે કે સુકાની મહેન્દ્રસિંહ ધોની શું મુકદ્દરના સકિંદર બનશે?