ભાવનગરનો પથિક ઈન્ટરનેશનલ ટેનિસ ખેલાડી બન્યો

- નેશનલ રેન્કિંગમાં ટોપ ૮ માં સ્થાન ધરાવતા ઇન્ટરનેશન ટે.ટેનિસ ખેલાડી
- પથિક મહેતાએ બૂટ ટાંગી દીધા!

ટેબલ ટેનિસના નકશામાં ભાવનગરને આંતરરાષ્ટ્રીય સ્તરે ખ્યાતિ અપાવનાર ભાવનગરના પેડલર પથિક મહેતાએ કરન્ટ નેશનલ પ્લેયર હોવા છતા વ્યાવસાયિક કારણોસર નિવૃત્તિ લેવાની ઘોષણા કરી છે. આગામી દિવસોમાં રાંચી ખાતે રમાનાર રાષ્ટ્રીય રમતોત્સવમાં ગુજરાતનું પ્રતિનિધિત્વ કર્યા બાદ તમામ પ્રકારની ટેબલ ટેનિસ કારકિર્દીને તેઓ અલવિદા કરી દેશે.

પોતાની ટેબલ ટેનિસ કારકિર્દી દરમિયાન પથિક મહેતાએ એશિયન ટેબલ ટેનિસ ચેમ્પિયનશિપ, વર્લ્ડ ચેમ્પિયનશિપ, દક્ષેસ રમતોત્સવ, દોહા એશિયન ગેમ્સ, કોમનવેલ્થ ટેબલ ટેનિસ ચેમ્પિયનશિપ ઉપરાંત અનેક દેશોમાં પ્રો-ટુર સ્પર્ધાઓમાં તેઓ રમી ચૂક્યા છે. હાલ તેઓ નેશનલ રેન્કિંગમાં ટોપ-૮માં સ્થાન ધરાવે છે અને આગામી રાષ્ટ્રીય રમતોત્સવમાં તેઓ અંતિમ વખત ગુજરાતનું પ્રતિનિધિત્વ કરશે.

ટેબલ ટેનિસમાં સુરજ મધ્યાહને તપતો હોવા છતા નિવૃત્તિનો આકરો નિર્ણય પિતાના વ્યવસાયમાં જોડાવાને ગણાવતા પથિકે ઉમેર્યું હતું કે, હું માત્ર રમવાનું છોડી રહ્યો છું, પરંતુ ટેલેન્ટેડ અને મહેનતુ યુવા ખેલાડીઓને મારા આંતરરાષ્ટ્રીય અનુભવથી તાલીમ આપીશ, અને આ રમતમાં ગુજરાતનું સ્તર સુધરે તેના માટે હંમેશા પ્રયાસરત જ રહીશ.