ફિલ્મ રિવ્યૂ: પટિયાલા હાઉસ

વાર્તા:પટિયાલા હાઉસ એવા પરિવારની વાર્તા છે જે ચાર પેઢીથી લંડનમાં રહે છે. પરિવારના મુખી છે, ગુરતેજ સિંહ (ઋષિ કપૂર) જેણે બનાવેલ નિયમો પ્રમાણે જ પરિવારના દરેક સભ્યોએ રહેવું પડે છે. પછી તેઓની મરજી હોય કે ન હોય.20 વર્ષ પહેલાની એક ઘટનાના કારણે ગુરતેજ સિંહને અંગ્રેજોથી નફરત હોય છે.

બીજી તરફ ગુરતેજ સિંહના પરિવારની નવી પેઢી પોતાના સપના પુરા કરવા માંગે છે. વડિલો તરફના પ્રેમ અને સન્માન માટે તેઓએ પોતાના સપનાને એક તરફ રાખવા પડે છે. પરઘટ સિંહ ઉર્ફે ગટ્ટુ (અક્ષય કુમાર) પ્રતિભાશાળી ઝડપી બોલર હતો, તે ઈંગ્લેન્ડ તરફથી ક્રિકેટ રમવા માગતો હતો. પરંતુ ગુરતેજ સિંહની જીદના કારણે તે એવું ન કરી શક્યો.

મનને મનાવીને ગટ્ટુ એક સ્ટોરમાં કામ કરે છે. પરંતુ આ બધા વચ્ચે તેને પોતાનું સપનું પુરુ કરવાની વધારે એક તક મળે છે,જેને તે કોઈ પણ કિંમતે ખોવા માંગતો નથી. જો કે હવે, ગટ્ટુ એક મુસીબતમાં મુકાઈ જાય છે. પરિવાર કે પોતાનું સ્વપ્ન આ બે વચ્ચેની પસંદગી ગટ્ટુ માટે મુશ્કેલી ઉભી કરી દે છે. ફિલ્મ પરિવારના સંબંધો પર આધારિત છે.

સ્ટોરી ટ્રીટમેન્ટ:પારિવારિક ડ્રામા હોવાને કારણે ફિલ્મમાં ઘણાં જ ઈમોશન્સ છે, જેમાં ક્રિકેટની વાર્તાને જોડીને ફિલ્મને વધુ દિલચશ્પ બનાવવાનો પ્રયાસ કરવામાં આવ્યો છે. નિખિલ અડવાણીએ તમામ કલાકારો પાસે ઉત્તમ અભિનય કરાવ્યો છે. વિશેષ કરીને રીષી કપૂર પાસે દમદાર અભિનય કરાવ્યો છે.

સ્ટાર કાસ્ટ:પોતાની કોમેડી ઈમેજથી બહાર નીકળીને અક્કીએ આ ફિલ્મમાં ગંભીર ભૂમિકા ભજવી છે. પોતાના સ્વપ્નોને પૂર્ણ કરવા માટે યુવકની પરેશાની અક્ષયે બખૂબી નિભાવી છે. જો કે ઘણીવાર અક્ષય લાગણીશીલ બની શકતો નથી. સિમરનની ભૂમિકામાં અનુષ્કાએ ઠીક-ઠાક કામ કર્યુ છે. જો કે ફિલ્મમાં તેને લાયક કોઈ કામ હતું જ નહીં.

સંગીત/સિનેમેટ્રોગ્રાફી/સંવાદો:પંજાબી પરિવારની વાર્તા હોવાને કારણે પંજાબી ફોક સોન્ગસ પર ભાર મૂકવામાં આવ્યો છે. શંકર-અહેસાન લોયે ફિલ્મની થીમ મુજબ સારૂં સંગીત આપ્યું છે. જો કે ફિલ્મમાં અક્ષય કુમાર અને અનુષ્કા શર્માની લવ સ્ટોરી હોવા છતાંય એક પણ રોમેન્ટિક સોન્ગ નથી. સિનેમેટ્રોગ્રાફી અને એડિટીંગ યોગ્ય છે. ખાસ કરીને મેચના દ્રશ્યોમાં ઘણું જ સારૂં એડિટિંગ છે.

શું જોવું: જો તમે વીક એન્ડ પર મનોરંજક પારિવારિક ફિલ્મની અપેક્ષા રાખો તો આ ફિલ્મ જોવાલાયક છે. અક્કીએ કોમેડીથી કંઈક અલગ કરવાનો પ્રયાસ કર્યો છે. જો તમે ડિમ્પલ-ઋષિના ચાહક હોવ તો આ ફિલ્મ જોવી જ જોઈએ.

શા માટે ના જોવી જોઈએ:ફિલ્મની સ્ટોરી અંગે જે અનુમાન લગાવવામાં આવ્યું હતું અને તે જ રીતની આ ફિલ્મ છે.