વડોદરા માણશે માઇક્રો લાઇટ એરક્રાફટની સફર

- એક્સ-ઇન્ડિયા એર એક્સપેડીશનના ભાગરૂપે શહેરની શાળા કોલેજોના વિઘાર્થી જુથોને હવાઇ આનંદ યાત્રાનો રોમાંચ માણવા મળશે

 
ભારતીય વાયુ સેનાના વિમાનીઓએ અતિ હળવા અને અઘતન નહીં પણ પરંપરાગત નિયંત્રણ ઉપકરણો ધરાવતા માઇક્રો લાઇટ એરક્રાફટમાં ૮૦ દિવસમાં વિશ્વનું હવાઇ પરિભ્રમણ પૂરું કરવાનું રોમાંચક સાહસ નોંધાવ્યું છે. 

આવા માઇક્રો લાઇટ એરક્રાફટને નિહાળવા અને તેમાં ઉડાણ ભરવાની તક સોમવાર તા. ૧૪/૦૨ના રોજ શહેરની શાળા-કોલેજોના પસંદ કરેલા આમંત્રિત વિઘાર્થી જુથોને મળશે. 

ભારતીય સંરક્ષણ દળોની સાહસ સંસ્કૃતિના ભાગરૂપે ભારતીય વાયુ સેનાએ માઇક્રો લાઇટ એરક્રાફટને માધ્યમ બનાવીને હાથ ધરેલા એક્સ-ઇન્ડિયા એર એક્સપેડીશન-૨૦૧૧ના ભાગરૂપે આ રોમાંચક આયોજન વાયુ સેનાના વડોદરા મથકના હરણી એરબેઝ ખાતે યોજવામાં આવ્યું છે.

વડોદરાના વતની અને ભારતીય વાયુ સેના ના ગ્રુપકેપ્ટન એમ.જી.મહેતાએ આ અભિયાન ની માહિતી આપતાં જણાવ્યું હતું કે, ખાસ કરીને યુવા સમુદાયને વાયુ સેનામાં જોડાવા માટે પ્રોત્સાહિત કરવાના હેતુસર સેના વિમાનીઓએ ૭મી ફેબ્રુઆરીના રોજ જમ્મુ-કાશ્મીરના ઉધમપુર ખાતેના વાયુ સેના મથકેથી આ અભિયાન શરૂ કર્યું છે જેનું સમાપન તા. ૨૧/૦૨ના રોજ ત્રિવેન્દ્રમ ખાતે થશે. હવાઇ દળના વડા મથકની એડવેન્ચર સેલ ટીમો આ નિદર્શન અને અભિયાનમાં ભાગ લઇ રહી છે.