ક્યારેક આ રીતે કરી જુઓ બ્રેક જર્ની-સર્ક્યુંલર જર્ની

 

 

ભારતીય રેલવેની આ સુવિધા અંતગર્ત રેલવે ઉતારુ પોતાના પ્રવાસમાં વચ્ચે જરૂર પડે તો એકાદ-બે દિવસ રોકાઇને ફરીથી પ્રવાસ કરી શકે છે. આ સુવિધાનો ફાયદો એ છે કે ઉતારુઓએ વારંવાર ટિકિટ લેવાની કે રિઝર્વેશન કરાવવાની જરૂર નથી પડતી.

સામાન્ય ટિકિટ: ૫૦૦ કિ.મી.થી વધુ અંતરની જવા કે આવવાની (સિંગલ જર્ની) ટિકિટ હોય તો પ્રવાસ શરૂ કરવાનો હોય એ સ્ટેશનેથી ૫૦૦ કિ.મી.ની મુસાફરી પૂરી થયા પછી રસ્તામાં કોઇ પણ સ્ટેશને યાત્રાવિરામ લઇ શકે છે. ૧૦૦૦ કિ.મી. સુધીના અંતર માટે અપાયેલી ટિકિટ પર એક યાત્રાવિરામ લઇ શકાય છે. આનાથી વધુ અંતરના પ્રવાસમાં બે યાત્રાવિરામ લઇ શકાય છે. યાત્રાવિરામની મુદત આગમન અને પ્રસ્થાનનો દિવસ છોડીને વધુમાં વધુ બે દિવસ છે. વિરામ માટે પ્રત્યેક ટિકિટને સ્વતંત્ર યાત્રાની ટિકિટ રૂપે ગણવામાં આવે છે.

રિઝર્વ ટિકિટ પર: રિઝર્વ ટિકિટ પર જે સ્ટેશન માટે રિઝર્વેશન કરાવ્યું હોય એના પહેલાના સ્ટેશને યાત્રાવિરામની મંજૂરી નથી મળતી. આ સંજોગોમાં વચ્ચે મુસાફરી સ્થગિત કરીને નિયમાનુસાર ટિકિટ પાછી આપીને રિફન્ડ લઇ શકાય છે. યાત્રાવિરામ કરતી વેળા અને ફરીથી મુસાફરી શરૂ કરતી વખતે પ્રત્યેક યાત્રાવિરામ માટે ઉતારુઓએ તેમની ટિકિટ કન્ફર્મ કરાવવાની રહે છે કારણ કે પ્રત્યેક યાત્રાવિરામ વેળા ટિકિટની વેલિડિટી માટે અલગ પ્રવાસ ગણવામાં આવે છે. ઉતારુ પ્રવાસ દરમિયાન આગળના કોઇ સ્ટેશને બીજી ગાડી પકડવા ઊતરે, તો આવા વિરામ (હોલ્ટ)ને યાત્રાવિરામ ગણવામાં નથી આવતો. શરત એટલી કે આ હોલ્ટ ૨૪ કલાકથી ઓછો હોય.