શું તમે વિદેશયાત્રા જઇ રહ્યાં છો? તો આટલુ જરૂર વાંચો

 

તમે વિદેશ પ્રવાસે જવાનું નક્કી કરી લીધું છે. બિસ્તરાં-પોટલાં બાંધી લીધા છે અને પ્રવાસની તારીખ પણ ઘણી નજીક છે તો તમારી વિદેશ યાત્રા સૌથી વધુ યાદગાર બની રહે અને પ્રવાસની મજા બેવડાઇ જાય તે માટે કેટલીક બાબતો ધ્યાનમાં રાખો. પ્લેનમાં પ્રવાસ શરૂ કરો તે પહેલાં નાની પણ મહત્વની બાબતોનો ખ્યાલ રાખો તો ખરેખર તમારો અમુલ્ય પ્રવાસ અવિસ્મરણીય બની જશે.

- એરલાઇન અથવા તો તમારા ટ્રાવેલ એજન્ટને પૂછી લો કે એરપોર્ટ પર ક્યારે પહોંચવાનું છે. પહેલાં ટિકિટ કાઉન્ટર પર જવાનું છે કે ચેકિંગ એરિયામાં એ વિશે જાણી લેવું. બધે એક્સરખા નિયમો હોતા નથી.

- જે દેશમાં ફરવા જાવ ત્યાંના વિઝાના નિયમો જાણી લો. તમારી પાસે વિઝા હોય તો તેની વેલિડિટી ચેક કરી લો.
- બોર્ડિંગ પાસ, ટિકિટ કન્ફર્મેશન, આઇ કાર્ડ વગેરે હાથવગા રાખવા.
- અમુક એરપોર્ટ પર એકથી વધુ ટર્મિનલ હોય છે એટલે તમારી ફ્લાઇટ કયા ટર્મિનલ પરથી ઉપડવાની છે તે સમયસર જાણી લો.
- ટિકિટ પર તમારી મુસાફરીની તારીખ અને ડિપાર્ચર ટાઇમ ફરીથી ચેક કરી લો. પ્રવાસની તારીખનું અચૂક ધ્યાન રાખવું. મધરાત પછીની મુસાફરી હોય તો તારીખ બદલાઇ જાય છે.
- એરલાઇન બેગેજ પોલિસી વિશે સંપૂર્ણ જાણકારી મેળવી લો. તેમાં તમારા સામાનની સંખ્યા, આકાર, વજનની મર્યાદા અંગે એરલાઇન કે ટ્રાવેલ એજન્ટ પાસેથી વિગતવાર જાણો.
- બેગમાં છરી, ચપ્પાં કે કાતર અથવા લાઇટર જેવી કોઇ ચીજ ન રાખો. ગિફ્ટ પણ પેક કરીને ન રાખો. ઓવરપેકિંગ યોગ્ય નથી. ચેકિંગ વખતે સામાન વેરવિખેર થઇ શકે છે. બને ત્યાં સુધી ઓવરપેકિંગ કરવાનો મોહ ટાળો.
- એવા કોઇ પ્રકારના ખાદ્યપદાર્થો સાથે ન રાખો જે તમારા માટે મહત્વના હોય પરંતુ સત્તાધિકારીઓને શંકા જાય, તો તેઓ તે ફેંકાવી દે છે અથવા સામાનમાંથી કઢાવી નાખે છે. માટે આ બાબતનું ખાસ ધ્યાન રાખવું.