બાળકની નસકોરી ફૂટે ત્યારે.....

ઉનાળામાં નસકોરી ફૂટવાથી નાના બાળકો તો ઠીક, મોટા પણ ક્યારેક ગભરાઇ જાય છે. આવા સમયે શાંતિથી યોગ્ય ઉપાય અજમાવવા જોઇએ.

ઘણા લોકોને ઉનાળાની તીવ્ર ગરમીમાં નસકોરી ફૂટવાની સમસ્યા પરેશાન કરે છે. આવી ગરમીમાં બિચારા ફૂલ જેવા કોમળ બાળકોની સ્થિતિ તો કેવી થાય? ઘણા બાળકોને પણ ઉનાળામાં નસકોરી ફૂટતી હોય છે. આનું કારણ ઋતુના પ્રમાણમાં શરીરમાં ગરમીનું પ્રમાણ વધી જવું તે છે. જ્યારે કેટલાક લોકો અથવા બાળકોને વધારે પડતાં ઉષ્ણ ગણાય એવા પદાર્થોનું સેવન કરવાથી પણ નસકોરી ફૂટે છે. ઉનાળામાં તો આ સમસ્યા વધારે ગંભીર બને છે. બાળકને જ્યારે નસકોરી ફૂટે ત્યારે તાત્કાલિક લોહી વહેતું કેવી રીતે બંધ કરી શકાય તે માટે કેટલાક ઘરગથ્થુ ઉપાય અહીં જણાવ્યા છે.

- ડુંગળી કાપી તેને નાક પાસે રાખી બાળકને સુંઘવાનું કહો.
- બાળકનું માથું આગળની તરફ ઝુકાવી માથા પર પાણી રેડૉ.
- કાળી માટી પર પાણી રેડી તે સુંઘાડૉ.
- રૂના પૂમડાંને સફેદ સિરકાવાળું કરી તેના જે નસકોરાંમાંથી લોહી નીકળતું હોય તેમાં નાખો.
- નસકોરી ફૂટે ત્યારે સીધા બેસાડી નાકના બદલે મોં દ્વારા શ્વાસ લેવાનું કહો.
- નાક પર ઠંડા પાણીમાં પલાળેલા રૂનાં પૂમડાં મૂકો. રૂના નાનાં નાનાં પૂમડાં બનાવી પાણીમાં પલાળી ફ્રીજમાં રાખી મૂકો. આ પૂમડાં તરત જ કામ લાગશે.
- કોથમીરના રસના થોડાં ટીપાં નાકમાં નાખો.
- આ તમામ ઉપાયો ઉપરાંત કપાળ પર ઠંડા પાણીના પોતાં મૂકવાથી પણ નસકોરી ફૂટવામાં રાહત રહેશે.