અમદાવાદ એરપોર્ટ પરથી ટેક ઓફ કરતા હો તો વાંચી લેજો

- અમદાવાદ-મુંબઇ રૂટની ફ્લાઇટમાં બને છે એવા બનાવો જે વિચારતા કરી મુકે - સતત બની રહી છે ચોરીની ઘટનાઓ - મોટાભાગની ઘટનાઓમાં બેગ તૂટેલી જોવા મળે છે - મોંઘીદાટ વસ્તુઓ અને કેમેરાની થાય છે ચોરી

અમદાવાદના સરદારનગર પોલીસ સ્ટેશન ખાતે ચેન્નાઇના રહેવાસી એવા એક હવાઇ મુસાફરે નોંધાવેલી ફરિયાદ મુજબ તેની બેગમાંથી 50 હજાર રૂપિયાની રોકડ ગુમ થઇ ગઇ હતી. તે મુંબઇથી અમદાવાદ આવી રહ્યો હતો ત્યારે આ ઘટના બની હતી. કહેવાય છે કે ચેકિંગ દરમિયાન મુસાફરની બેગ તૂટેલી હાલતમાં જોવા મળી હતી જેની તેને જાણ પણ કરી દેવાઇ હતી. ચોરીનો આ બીજો એવો બનાવ છે જે મુંબઇ-અમદાવાદ વચ્ચેની ફ્લાઇટમાં બન્યો હોય.

અમદાવાદ-મુંબઇ ફ્લાઇટમાં બની રહેલી ચોરીની ઘટનાઓ સુરક્ષાની ખામી તરફ અંગુલી નિર્દેશ કરી જાય છે. આવી ઘટનાઓ રોકવા પોલીસે શું પગલાં લીધા તેવા સવાલો પણ ઉઠી રહ્યા છે. અમદાવાદ એરપોર્ટ પર ચોરીની ઘટનાઓ સતત બની રહી છે. જેમાંની મોટાભાગની ઘટનાઓમાં બેગ તૂટેલી જોવા મળે છે અને તેમાંની મોંઘી વસ્તુઓની ચોરી થઇ ગઇ હોય છે.

એરપોર્ટ સિક્યુરિટી સાથે સંકળાયેલા સુત્રોએ જણાવ્યું હતું કે "ચોરીની 80 ટકા જેટલી ઘટનાઓ નોંધાતી જ નથી કારણ કે ઘણીવાર મુસાફર ફ્લાઇટ પકડવાની ઉતાવળમાં હોય છે તો ઘણીવાર શહેર છોડ્યા બાદ તેને ચોરીની જાણ થાય છે. મોટાભાગની ઘટનાઓમાં રોકડ અને કેમેરા જેવી ચીજવસ્તુઓની જ ચોરી થાય છે. માથાકૂટમાં પડવાને બદલે વિદેશીઓ ઘણીવાર ફરિયાદ નોંધાવાનું પણ ટાળે છે."

સરદારનગર પીઆઇ વી.એસ.સરવૈયાએ કહ્યું હતું કે "મોટાભાગની ચોરીઓ અમદાવાદ-મુંબઇ રૂટની ફ્લાઇટમાં નોંધાયેલી છે. જે દર્શાવે છે કે કાં તો અમદાવાદ અથવા તો મુંબઇમાં ચોરી થઇ હોવી જોઇએ. સિક્યુરિટી ચેકિંગ થયા પછી જ ચોરીની ઘટનાઓ બને છે જે દર્શાવે છે કે તેમાં લોડર્સની સંડોવણી હોવી જોઇએ."

ઉલ્લેખનીય છે કે મોટાભાગની એરલાઇન્સ કોન્ટ્રાક્ટ પર પ્રાઇવેટ એજન્સી પાસેથી લોડર્સની સેવા મેળવે છે.