ધરતીની આ રહસ્યમય માયા કોઈ સમજી શક્યું નથી

  >સમતોલ વિસ્તારમાં માટીના ઢગ કેવી રીતે બન્યા તે શોધી શકાયું નથી

જમીન પર ગોળાકાર ગુંબજ જેવા સ્ટ્રક્ચરને મિમા માઉડ્સ કહેવામાં આવે છે. અમેરિકાના ઉત્તર પશ્ચિમ વિસ્તારો ઈડાહો, ઓરેગોન અને વોશિંગ્ટનમાં અનેક જગ્યાએ આ પ્રકારના માઉડ્સ કુદરતી રીતે બનેલા છે. તેનો વ્યાસ ત્રણથી લઈને 50 મીટર સુધી હોય છે.

તેની ઉંચાઈ 30 સેન્ટીમીટરથી લઈને બે મીટર સુધી હોય છે. અમેરિકાના આ વિસ્તારમાં સમતોલ જમીન પર આ માટીના ઢગ કેવી રીતે બન્યા, આ વાત આજ દિવસ સુધી કોઈ સમજાવી શક્યું નથી. તેને જોઈને એવું લાગે કે જાણે કોઈના ચહેરા પર ખીલ ઉપસી આવ્યું હોય.

વોશિંગ્ટનના થ્રસ્ટન કાઉન્ટીના મિમા પ્રાઈરે પરથી તેનું નામ મિમા માઉડ્સ પડ્યું છે. બધા વિસ્તારમાં આવેલા માટીના આવા ઢગ એક આકારના નથી. વોશિંગ્ટનમાં આવા માઉડ્સની ઉપર કાળી માટીની નીચે રેતાળ માટી છે.

યુનિવર્સિટી ઓફ વોશિંગ્ટને આ અંગે સંશોધન પણ કર્યું છે. તેના જણાવ્યા પ્રમાણે આ અજબ-ગજબ વાત છે. ખાસ કરીને સુકાય ગયેલા વૃક્ષો અને પ્રાણીઓ જેવા ઓર્ગેનિક તત્વો માટીના ઉપરના ભાગમાં હોય છે. જ્યારે મિમા માઉડ્સમાં બે મીટર સુધી શુદ્ધ માટી હોય છે.

આ અંગે અનેક વૈજ્ઞાનિકો પોતાનો અલગ અલગ મત પ્રગટ કરી ચુક્યા છે. કોઈને આ ભૂકંપનું પરિણામ લાગ્યું તો અમુક લોકોએ બરફ યુગ બાદ ગ્લેશિયર્સ ઓગળવાને કારણે આવું થયાનું કહ્યું. આ અંગે અનેક થીયરીઓ રજૂ કરવામાં આવી હતી, છતાં પણ સૌ ટકા દાવા સાથે આ અંગેનું કારણ કોઈ રજૂ કરી શક્યા નથી.

એક રહસ્ય...

અમેરિકામાં અનેક જગ્યાએ જમીન પર કુદરતી રીતે માટી ઉપસી આવી છે. જેના કારણે માટીના નાના ઢગ બની ગયા છે. આ કેવી રીતે બન્યા હતાં તેનું રહસ્ય આજે પણ અકબંધ છે.