તસવીર જોયા પછી કંઈ કહેવાની જરૂર છે ખરી?

દારૂ ઢીંચ્યા બાદ ખાલી બોટલો કચરાપેટી પર ગોઠવી દીધી

બગસરામાં પોલીસની જાણે બીક જ ન રહી હોય તેમ કેટલાક દારૂડિયાઓએ દારૂ ઢીંચ્યા બાદ દારૂની ખાલી બોટલો કચરાપેટી ૫ર ગોઠવી દઇ ‘ખાખી’ ની આબરુનું જાહેરમાં લિલામ કર્યું હતું.

બગસરામાં પણ લગ્નની મૌસમ પૂરબહારમાં ખીલી છે. લગ્નમાં વિદેશી દારૂનું ચલણ વધી રહ્યું છે. તેનો પુરાવો આપતી ઘટના બની હતી. શહેરની મધ્યમાં આવેલી બજારમાં એક કચરાપેટી પર દારૂની ખાલી બોટલો લાઇનસર ગોઠવાયેલી જોઇને લોકોમાં અનેકવિધ ચર્ચા શરૂ થઇ હતી.

જ્યાં દારૂની ખાલી બોટલો ગોઠવવામાં આવી હતી ત્યાં બાજુમાં જ લગ્નપ્રસંગ માટેની બે વાડી આવેલી છે. આથી, મહેમાનોએ પાર્ટી માણ્યા બાદ કદાચ વધારે પડતું ઢીંચી જવાથી ખાલી બોટલો જાહેરમાં ગોઠવવનું નક્કી કર્યું હશે તેવું માનવામાં આવી રહ્યું છે.

શહેરમાં જાહેર શૌચાલયોમાં દેશી દારૂની કોથળીઓ મળવાની ઘટના તો અનેકવાર બની ચૂકી છે. પરંતુ, સોમવારે જાહેરમાં જે રીતે દારૂની ખાલી બોટલો ગોઠવવામાં આવી તેનાથી પોલીસને નીચાજોણું ચોક્કસ થયું છે. ત્યારે દારૂની બોટલ મૂકી જનારને પકડવા જરૂરી છે.