૧૬ મેગાપિક્સેલવાળો મોબાઈલ

 

૩-ડી તસવીરો ખેંચી શકે તેવો કેમેરા

લંડન: એક નવા કોમ્પેકટ કેમેરાની મદદથી આપ ૩-ડી તસવીરો લઈ શકો છો. આ તસવીરો જોવા માટે આપને ચશ્માંની પણ જરૂર નહીં પડે. ફ્યૂજી ફિલ્મ ડબ્લ્યૂ-૩ કેમેરાથી આપ પ્રથમ વખત પોતાના માથાને ૩-ડીના રૂપમાં જોઈ શકશો અને એ પણ કોઈ મેડિકલ સ્કેનર કે ચશ્માંની મદદ વગર જ આ શક્ય બનશે. આ કેમેરાની સ્ક્રીન પર તુરંત ૩-ડી તસવીરો આવી જાય છે. તેમાં લેન્ટિકુલર ૩-ડી સિસ્ટમનો ઉપયોગ કરવામાં આવે છે. આ કેમેરામાં સૌથી બહેતર તસવીર સ્ક્રીનની બરાબર સામે રહીને જોઈ શકાય છે. આ કેમેરાની એક વિશેષતા એ પણ છે કે તેને માત્ર એક બટન દબાવીને ૨-ડી કેમેરામાં પણ ફેરવી શકાય છે.

અપમાનજનક વીડિયોના આરોપમાં યુ-ટ્યૂબ સામે કેસ

ટોરોન્ટો: યુ-ટ્યૂબ પર કોઈ વ્યક્તિનો વીડિયો મૂકવો આપના માટે ભારે પડી શકે છે. ટોરોન્ટોના એક પોલીસ કોન્સ્ટેબલે યુ-ટ્યૂબ સામે કેસ દાખલ કરી ૧૨ લાખ ડોલરના વળતરની માગણી કરી છે. એડમ જોસેફ નામના આ કોન્સ્ટેબલને ટોરોન્ટોમાં જુન મહિનામાં યોજાયેલ જી-૨૦ સંમેલનમાં ફરજ પર મૂકવામાં આવ્યો હતો. આ દરમિયાન કોઈ વ્યક્તિએ તેની તસવીરો ખેંચી યુ-ટ્યૂબ પર મૂકી દીધી હતી. આ વીડિયોમાં એડમ એક મહિલાને પોતાના મોં પર ચ્યૂઈંગમથી બબલ ન ફુલાવાનું જણાવી રહ્યો છે. વીડિયો જોતા તેની મજાક ઉડાવવામાં આવતી હોય તેમ જણાઈ રહ્યું છે. એડમે યુ-ટ્યૂબને એ વ્યક્તિનું નામ પણ પૂછ્યું છે જેણે આ વીડિયો ઈન્ટરનેટ પર મૂક્યો છે.

ઈ-મેલ સ્પામ ઓછા થયા પરંતુ વાઈરસનું જોખમ વધ્યું

વોશિંગ્ટન: છેલ્લા થોડા દિવસોમાં આપને જોવા મળ્યું હશે કે આપના ઈનબોક્સમાં ઈ-મેલ સ્પામ ઘણા ઓછા આવતા હશે. ગૂગલના એક અભ્યાસમાં જાણવા મળ્યું છે કે સ્પામની સંખ્યા તો ઘટાડવામાં આવી છે પરંતુ તેમાં વધુ વાઈરસ હોઈ શકે છે. અભ્યાસમાં જાણવા મળ્યું હતું કે ઓગસ્ટ અને સપ્ટેમ્બર મહિનામાં સ્પામની સંખ્યામાં ગત વર્ષે આ જ સમયની સરખામણીએ ૨૪ ટકા ઓછી નોંધાઈ છે. પરંતુ ઓગસ્ટમાં ગૂગલે જે ઈ-મેલ પ્રોસેસ્ડ કર્યા તેમાં વાઈરસ ગત વર્ષની સરખામણીએ ૧૧ ટકા વધારે હોવાનું જાણવા મળ્યું છે. ગૂગલની સિસ્ટમે માત્ર એક જ દિવસમાં વાઈરસવાળા ૧૮.૮ કરોડ ઈ-મેલ બ્લોક કર્યા છે.

૧૬ મેગાપિક્સેલવાળો મોબાઈલ

લંડન: હાલ આપણને મોબાઈલ ફોનમાં ૧૨ મેગાપિક્સેલના કેમેરા અંગે સાંભળીને પણ આશ્ચર્ય થાય છે પરંતુ સોની એરિકસનના નવા એસ૦૦૬ સ્માર્ટફોનમાં ૧૬ મેગાપિક્સેલનો કેમેરા લાગેલો હશે. આ કેમેરા જાપાની કંપની કેડીડીઆઈ ઉપલબ્ધ કરાવશે. આ ફોનમાં વાઈફાઈ, એફએમ ટ્યૂનર, જીપીએસ, બ્લૂ ટૂથ ઉપરાંત ૩.૩ ઈંચની સ્ક્રીન લાગેલો હશે. આ સ્ક્રીન સંભવત: ટચ સ્ક્રીન હશે.