હવે કેનેડાનો પણ ગુજરાતમાં રસ વધ્યો

આ વખતે વાયબ્રન્ટ ગુજરાત 2011માં પાર્ટનર કન્ટ્રી તરીકે કેનેડા હતું

અમેરિકા સહિતના દેશ તો ગુજરાતમાં રસ ધરાવતા જ હતા પણ હવે કેનેડાએ પણ ગુજરાતમાં પોતાનો રસ વધાર્યો છે. તાજેતરમાં સંપન્ન થયેલી વાયબ્રન્ટ ગુજરાત ગ્લોબલ સમિટ 2011માં પાર્ટનર કન્ટ્રી તરીકે કેનેડા હતું.

કેનેડાએ પણ ગ્લોબલ બીઝનેસ હબ તરીકે ગુજરાતના દરજ્જાને આ સાથે સ્વીકારી લીધું છે.

નોંધનીય છે કે કેનેડા તરફથી આ સમિટમાં ઉપસ્થિત રહેલા રાજદ્વારી અને વ્યાપારી પ્રતિનિધિમંડળે ગુજરાતમાં ઓટોમોટિવ અને ક્લિન ટેકનોલોજી સેકટર માટે રોકાણ કરવા તરફ ધ્યાન આપ્યું હતું.

કેનેડાના પ્રતિનિધિઓએ જણાવ્યું હતું કે, કેનેડા ભારતમાં તો વ્યાપક પ્રમાણમાં રોકાણ કરવા આયોજન કરી રહ્યું છે પણ તે સાથે ખાસ કરીને ગુજરાત જેવા ઝડપથી વિકાસ કરી રહેલા રાજ્યમાં પણ રોકાણ કરવા માટે ખાસ ધ્યાન આપી રહ્યું છે.