આ વહાણ પર બેસનાર કોઈ વ્યક્તિ ઘરે ન પહોંચી શક્યો...!

 

  >માર્યા ગયેલા તમામ લોકોની આંખો ખુલ્લી હતી>ક્રૂ મેમ્બર સહિત વહાણનો કૂતરો પણ માર્યો ગયો હતો

ફેબ્રુઆરી 1948ની વાત છે. ઈન્ડોનેશિયા નજીક અનેક શીપોને ડચના એસએસ ઓરંગ મેડન નામના માલવાહક વહાણ તરફથી મદદ માટેના અનેક સંદેશ મળ્યા હતાં. સંદેશ કંઈક આવો હતો, ‘વહાણ પર કેપ્ટન સહિત તમામ લોકોના મોત થયા છે. શક્ય છે કે તમામ ક્રૂ મેમ્બરો માર્યા ગયા છે.’ આ સંદેશ સાંકેતિક ભાષામાં મોકલવામાં આવેલા એવા સંદેશ બાદ મળ્યો હતો જેમાં લખવામાં આવ્યું હતું કે, ‘હું મરી રહ્યો છું’.

સંદેશ મળ્યાના કલાકો બાદ બચાવદળ અહીં આવી પહોંચ્યો હતું અને મેડનના કેપ્ટનને બોલાવવાનો પ્રયાસ કર્યો હતો. જો કે સામેથી કોઈ પ્રત્યુત્તર ન મળતા વહાણ પર બચાવ ટુકડી મોકલવામાં આવી હતી. બચાવ ટુકડીના સભ્યો જ્યારે વહાણ પર પહોંચ્યા ત્યારે તેના દ્રશ્યો ખૂબ ભયંકર હતાં. એક સમયે તો વહાણ પર પહોંચેલા બચાવદળના લોકો અહીંનું દ્રશ્ય જોઈને થરથરી ગયા હતાં. વહાણ પર કેપ્ટન સહિત તમામ સભ્યોના મોત થયા હતાં.

માર્યા ગયેલા તમામની આંખો ખુલ્લી હતી તેમજ બધાના મોઢા સૂર્ય તરફ હતાં. તેમના બધાના ચહેરા ખૂબ ડરાવનાક હતાં. એટલું જ નહીં વહાણનો કૂતરો પણ માર્યા ગયો હતો. આ સમયે અહીંના વાતાવરણનું તાપમાન આશરે 110 ફેરનહિટ હતું.

આથી બચાવ ટુકડીએ આ શીપને ટો કરીને ફરીથી દરિયાકિનારે લઈ જવાનું નક્કી કર્યું હતું. પરંતુ તેઓ આવું કરે તે પહેલા જ વહાણમાંથી ધુમાડો નીકળવા લાગ્યો હતો. આવા દ્રશ્યો જોઈને બચાવ ટુકડીએ અહીંથી દૂર ભાગવાનો નિર્ણય લીધો હતો. ત્યાર બાદ ઓરંગ મેડનને બાંધવામાં આવેલું દોરડું કાપી નાખવામાં આવ્યું હતું. તેના થોડા સમય બાદ જ વહાણમાં જોરદાર વિસ્ફોટ થયો હતો, ત્યાર બાદ તે પાણીમાં ડૂબી ગયું હતું.

આજ દિવસ સુધી ઓરંગ મેડનના કેપ્ટન અને તેના સભ્યોનું મોત કેવી રીતે થયું તે એક રહસ્ય જ બની રહ્યું છે. તેમના મોત અંગે અનેક તારણો કાઢવામાં આવ્યા છે. અમુક લોકો એવું માની રહ્યા છે કે સમુદ્રના ચાંચિયાઓ દ્વારા તેમની હત્યા કરવામાં આવી હતી. જ્યારે અમુક લોકોએ એવી થીયરી રજૂ કરી હતી કે વહાણમાં ગેરકાયદે કેમિકલ ભરીને લઈ જવામાં આવી રહ્યું હતું, જે એટલું ખતરનાક હતું કે સમુદ્રમાં પાણ સાથે સંપર્કમાં આવ્યા બાદ તમામ લોકોના મોત થયા છે. અમુક લોકોએ આ ઘટનાને ભૂત અને એલિયન સાથે પણ જોડી છે.

એક રહસ્ય...

ડચના ઓરંગ મેડન નામના વહાણ સાથે શું થયું? વહાણ પર હાજર લોકોની હત્યા કોણે કરી હતી? વગેરે પ્રશ્નો આજે પણ એક કોયડો બનીને રહી ગયા છે. સમુદ્રમાં અત્યાર સુધી બનેલા બનાવોમાં ઓરંગ મેડનનની દુર્ઘટના સૌથી ભયંકર હતી.