આઓ ટ્વિસ્ટ કરેં: ડાન્સનાં પચાસ વર્ષ

ઉમંગ અનુભવીએ ત્યારે મન સાથે પગ પણ નાચી ઊઠે છે ને? મદહોશીની છેવટની સ્વર્ગીય સીમા સુધી પહોંચાડવાની નૃત્યની ક્ષમતા ગજબનાક છે, ખરેખર. સ્વર્ગની તો આપણને ખબર નથી પણ યૌવનથી છલોછલ યુગલોએ ઘણી વાર ડાન્સમાં રમમાણ થઈને ધરતી પર સ્વર્ગનો અનુભવ કર્યોછે ખરો. ડાન્સના આ રંગીન મેળામાં સૌથી વધુ ચર્ચિત બન્યો ટ્વિસ્ટ ડાન્સ. એ દુનિયાને ૫૦ વર્ષથી નચાવી રહ્યો છે.

૧૯૬૦માં ચબી ચેકર નામના એક સંગીતકારનું ગીત ‘ધ ટ્વિસ્ટ’ ટીવીના ડાન્સ શોથી એકદમ ગાજી ઊઠ્યું. એના ઈશારે દુનિયા થિરકવા લાગી. ટ્વિસ્ટ સોંગ્સ એન્ડ ડાન્સે ધૂમ મચાવવા માંડી. ટ્વિસ્ટ આજે પણ પોપ્યુલર છે. અમેરિકાના બિલબોર્ડ હોટ-૧૦૦ રેટિંગમાં આ ગીત નંબર વનના સિંહાસન પર લાંબો સમય રહ્યું. એના રચયિતા ચબી ચેકર નૃત્યસમ્રાટ કહેવાવા લાગ્યા.

એક સમ્રાટની જેમ તેઓ પોતાના ઈશારે દુનિયાને નચાવતા હતા. એક વિશાળ તસવીર બની, જેમાં ટ્વિસ્ટ મુદ્રામાં ચબી એક તરફ ઊભા છે અને નીચે લખ્યું હતું ‘ટ્વિસ્ટ રાઉન્ડ ધ વર્લ્ડ’. બીજી તરફ દુનિયાભરના દેશોનાં ચિહ્નો લહેરાય છે. આ નૃત્યશૈલીથી સિનેમા કેવી રીતે દૂર રહી શકે? દેશ-વિદેશની ફિલ્મો આ જાદુમાંથી બચી ન શકી.

ફિલ્મો બ્લેક એન્ડ વ્હાઈટમાંથી રંગીન બની, પણ ટ્વિસ્ટનું આકર્ષણ, પ્રતિષ્ઠા, પ્રભાવ ઓછાં ન થયાં. ૨૦૦૭માં રિલીઝ થયેલી ફિલ્મ ‘સ્પાઈડરમેન-૩’માં પણ ટિ્વસ્ટે હાજરી વર્તાવી. બોલો, તમારે કયા ગીત પર ઝૂમવું છે - ‘કમ ઓન બેબી, લેટ્સ ડુ ધ ટ્વિસ્ટ’ પર, ‘ટેક ધ વર્લ્ડ બાય ધ હેન્ડ એન્ડ ડૂ ધ ટ્વિસ્ટ’ ગીત પર કે પછી એની ભારતીય આવૃત્તિ જેવા ‘આઓ ટ્વિસ્ટ કરેં, પ્યાર કા મોસમ’ ગીત પર? ચોઈઝ ઈઝ યોર્સ.