ભૂજના બાળકોને પણ મઝા કરાવે છે એક શિલા

એરપોર્ટ ઉપર આવતા વિમાનોને જોવા માટે સામાન્ય રીતે ભૂલકાંઓ જ્યારે જીદ કરે ત્યારે પ્રવેશ ટિકિટ લઇને તેમને પ્લેન બતાવવામાં આવતું હોય છે. પરંતુ ભુજમાં જો લેન્ડ કરતા કે, ટેક ઓફ કરતા વિમાનને આસાનીથી જોવું હોય તો મફતમાં એક ‘શીલા’ની મદદથી જોઇ શકાય છે. તમે કોઇ ગેરસમજ કરો તે પહેલાં અહીં ખુલાસો કરી દઇએ કે, આ ‘શીલા’ એટલે પેલી કેટરિના કૈફ નહીં,પરંતુ ભુજ એરપોર્ટને અડીને આવેલી ખાનગી જમીનમાં વર્ષોથી પડેલો પથ્થર છે.

ભુજ એરપોર્ટ ઓથોરિટીને સુરક્ષાની દ્રષ્ટિએ પણ જોખમી લાગતા આ પથ્થરને હટાવવા માટે તેમણે જમીન સુદ્ધાં ખરીદવાની તૈયારી બતાવી છે. આ માટે એરપોર્ટે કચ્છના વહીવટી તંત્રને પત્ર પણ લખ્યો છે. જોકે, આ લેટર લખાયો ત્યારે તેમને ખબર નહોતી કે, જમીન સરકારી છે કે, ખાનગી. એરપોર્ટના સત્તાવાળા માત્ર સુરક્ષાની દ્રષ્ટિએ જ નહીં પરંતુ ભવિષ્યમાં એરોપ્લેનને ચડતા-ઉતરતા કોઇક વાર તકલીફ ન પડે તેને ધ્યાનમાં રાખીને પણ આ મહાકાય પથ્થરને દૂર કરવા માંગી રહ્યા છે.

ભુજ એરપોર્ટ ઓથોરિટીના અધિકારીનો વારંવાર સંપર્ક કરવા છતાં આ મુદ્દે તેમની પ્રક્રિયા જાણી શકાઇ નહોતી, જ્યારે કચ્છ કલેક્ટર એમ. થેન્નારસને જણાવ્યું હતું કે, જમીન ખાનગી માલિકીની હોવાથી એરપોર્ટ ઓથોરિટી ધારે તો તેને ખરીદી શકે છે.