તૈલી ત્વચા અને ખીલની સમસ્યા

પ્રશ્ન : મારી ઉંમર વીસ વર્ષ છે. લગભગ બે વર્ષથી મારા ચહેરા પર ડાઘ છે. આ ડાઘ દૂર થઇ શકે ખરા?

ઉત્તર : તમે એ નથી જણાવ્યું કે તમારા ચહેરા પર શેના ડાઘ છે. કયા કારણસર એ ડાઘ થયા છે તે જાણ્યા વિના કહેવું મુશ્કેલ છે કે ડાઘ દૂર થઇ શકે કે નહીં. જોકે તમે કાચા દૂધથી ચહેરો નિયમિત રીતે સાફ કરતાં રહો તો થોડો ફરક પડશે.

પ્રશ્ન : હું ઘઉંવણીઁ છું. મારી ત્વચા તૈલી છે અને ચહેરા પર ખીલ થાય છે. તેના ખાડા પણ છે. એવો ઉપાય બતાવશો કે મારો ચહેરો સાફ અને ઓછો તૈલી રહે?

ઉત્તર : ચહેરા પર જ્યાં ખીલના ડાઘ હોય ત્યાં બટાકાંને છીણીને તે લગાવો. ચહેરા પર ખાડા પડ્યા હોય ત્યાં ટામેટાનો રસ લગાવો. આનાથી તમારો ચહેરો થોડો સાફ અને રંગ પણ સારો થશે, તેમ જ ખીલ પણ ઓછા થશે. દિવસ દરમિયાન ચહેરો ધોતાં રહો.

પ્રશ્ન : મારી ઉંમર ચાલીસ વર્ષ છે. મારી સમસ્યા એ છે કે મારા વાળ એકદમ શુષ્ક અને વાંકડિયા છે. વળી, છેલ્લા એક વર્ષથી વાળ ખૂબ ખરે છે. માથામાં ખોડો થવાની સાથે વાળ સફેદ પણ થવા લાગ્યા છે. મારે શું કરવું જોઇએ?

ઉત્તર : વાળની શુષ્કતા દૂર કરવા માટે તમે માથામાં દહીં લગાવો. વાળ જો વધારે પ્રમાણમાં ખરતાં હોય તો ઓલિવ ઓઇલથી નિયમિતરૂપે મસાજ કરો. સફેદ વાળ તો તમારી ઉંમરને કારણે હવે થવાનાં, પણ તમે જો કાળા વાળ રાખવા ઇચ્છતાં હો, તો હેર કલર કે હેરડાઇનો ઉપયોગ કરી શકો છો. જોકે તે સારી કંપનીના વાપરવા. જો હેર કલર કે હેરડાઇ ન કરવા હોય તો મેંદી પણ કરી શકો.

પ્રશ્ન : મારી ઉંમર ત્રેવીસ વર્ષ છે. મેં સાંભળ્યું છે કે અરોમાથેરપીથી સુંદરતા વધે છે. મને અરોમાથેરપી વિશે જણાવશો અને હું આ થેરપી કરાવું તો મને લાભ થાય ખરો?

ઉત્તર : તમારે કયા કારણસર અરોમાથેરપી લેવી છે તે તમે જણાવ્યું નથી. અરોમાથેરપીને તમે ગુજરાતીમાં ગંધ ચિકિત્સા કહી શકો. આમાં સુગંધીદાર તેલ અને એસેન્સથી ટ્રીટમેન્ટ કરવામાં આવે છે. દરેક વ્યક્તિને અલગ અલગ જરૂરિયાત પ્રમાણે એસેન્શિયલ ઓઇલનો ઉપયોગ કરીને સૌંદર્યોપચાર કરવામાં આવે છે જેમાં ફેશિયલ મસાજથી લઇને સ્કાલ્પ મસાજ સુધીની દરેક બ્યૂટિ ટ્રીટમેન્ટ આપવામાં આવે છે.