ગાંધીજી માટે પ્રેમ માત્ર એક કોંગ્રેસીને અને એ પણ અધૂરો!

- સુરતમાં જાહેર પ્રાર્થનાસભામાં માત્ર શહેર કોંગ્રેસ પ્રમુખની હાજરી

ગાંધી નિવૉણ દિને સુરત મહાનગર પાલિકા દ્વારા ચોક બજાર ગાંધી પ્રતિમા ખાતે યોજાયેલા જાહેર પ્રાર્થના સભાના કાર્યક્રમમાં સમ ખાવા પૂરતા એક જ કોંગ્રેસી પહોંચ્યા અને તે પણ અધવચ્ચેથી ઊઠીને ચાલ્યા ગયા હતા. આ કાર્યક્રમમાં પાલિકાના વિપક્ષના નેતા કે એક પણ સભ્ય નહીં આવતા હાજર લોકોમાં આશ્ચર્ય સર્જાયું હતું.

કહેવાય છે કે ભાજપનો કાર્યક્રમ માની પાલિકામાં વિપક્ષનું સ્થાન શોભાવનારા ગણ્યાંગાંઠયા સભ્યો પણ દેશાના રાષ્ટ્રપિતાને શ્રદ્ધાંજલિ અર્પવા ફરક્યા નહોતા. માત્ર શહેર કોંગ્રેસના પ્રમુખ શંભુભાઈ પ્રજાપતિ ગાંધીજીને વંદન કરવા આવ્યા હતા અને તે પ્રખર ગાંધીવાદીની બગલમાં બેઠાં હતા.

જોકે, થોડીવારમાં તેઓ ચાલુ પ્રાર્થનાએ ઊઠીને જતા રહ્યાં હતા. આ અંગે શંભુભાઈને પુછાયું તો તેમણે કહ્યું કે મને આમંત્રણ નહોતું પણ જાહેર કાર્યક્રમ હોવાથી હું ગયો હતો અને બાદમાં કોંગ્રેસ કાર્યલય પરના ગાંધીજીને શ્રદ્ધાંજલિ આપવાના કાર્યક્રમમાં પહોંચ્યો હતો.કોંગ્રેસીઓ ન આવવા પાછળનું કારણ પણ પાર્ટીનો આ કાર્યક્રમ જ હતો.