હનીમૂનમાં પણ સાસુમા સાથે...ઓહ નો!

હનીમૂન પર સાસુને સાથે લઈ જતા એક પત્નીએ કરી છૂટાછેડાની માંગ

રોમની 36 વર્ષીય મેરિઆનાને એવું લાગતું હતું કે લગ્ન પછી તે માત્ર પોતાના પતિની સાથે જ હનીમૂન પર જશે, પરંતુ તેના પતિ સ્ટીફેનોનું આયોજન તો કંઈક અલગ જ હતું. હનીમૂન મનાવવા માટે સ્ટીફેનોએ પેરિસની જે હોટલમાં પોતાના માટે રૂમ બુક કરાવ્યો હતો, ત્યાં જ તેણે પોતાની મા માટે પણ એક રૂમ બુક કરાવ્યો હતો. ડેઇલી મિરર પ્રમાણે પેરિસ જવા માટે મેરિઆના જ્યારે એરપોર્ટ પહોંચી ત્યારે તે પોતાની સાસુમાને ત્યાં જોઈને ચોંકી ગઈ હતી.

તેના વકીલે જણાવ્યા પ્રમાણે મેરિઆનાના પતિનો પોતાની મા સાથેનો ભાવનાત્મક લગાવ કંઇક વધારે પડતો જ છે. આથી તેને છૂટાછેડા જોઇએ છે. હનીમૂન પર સાસુને સાથે લઈ જવાની વાત તેના ગળે નથી ઉતરતી. આ ત્રણેય જણા સાથે જ પેરિસ ગયા હતા.

અહીંયા તેણે પોતાનો મોટા ભાગનો સમય પતિ સાથે ગાળવાના બદલે સાસુમા સાથે જ વિતાવવો પડ્યો હતો. આ પછી મેરિઆનાએ પતિથી અલગ થવાનો નિર્ણય લીધો છે.