બાળકોના મિત્રો પણ છે મહત્વનાં

 

બાળકો જેમ જેમ મોટા થતાં જાય, તેમ તેમ મિત્રો સાથે સમય પસાર કરવાનું વધારે પસંદ કરે છે. એક અધ્યયન દ્વારા જાણવા મળ્યું છે કે બે વર્ષના બાળકો પોતાના મિત્રો સાથે આખા દિવસનો દસ ટકા સમય વીતાવે છે, ચાર વર્ષના બાળકો વીસ ટકા અને સાતથી અગિયાર વર્ષના બાળકો ૪૦ ટકા સમય મિત્રો સાથે વીતાવવાનું પસંદ કરે છે.

જે બાળકો મિત્રો સાથે હળીમળીને રહેતાં હોય તેમનું વર્તન હકારાત્મક હોય છે. તેમનામાં નકારાત્મક ભાવ ઓછો જોવા મળે છે. બાળકોના મિત્રો તેમના માટે સારું અને સહજ વાતાવરણ ઊભું કરે છે, જ્યાં સંતાન સહજતા અનુભવે છે અને સહયોગ તથા નેતૃત્વના ગુણો શીખે છે. જે બાળકો મિત્રવર્તુળમાં પસંદ કરવામાં આવે છે, તેઓ સામાજિક અને નૈતિક સમજદારી ધરાવતાં હોય છે. તેઓ સમાજમાં સારી રીતે રહી શકે છે.

બાળકો માટે મિત્રો કેમ મહત્વપૂર્ણ છે?
નિષ્ણાતોના મતાનુસાર, બાળકોના સવાઁગી વિકાસમાં બાળકોના મિત્રો મહત્વપૂર્ણ ભૂમિકા ભજવે છે. જોકે બાળકોના મિત્રો સારા હોય એ ખૂબ જરૂરી છે કેમ કે મિત્રો જેવા હશે એવું બાળક બનશે. નાના બાળકો પોતાના મિત્રોને પોતાના જેવા બનાવવા ઇચ્છે છે અને તેના લીધે કેટલીક વાર તમારું ભલુંભોળું બાળક જાણ્યે-અજાણ્યે મિત્રો જેવું બનતું જાય છે.

એ વાત તો સર્વવિદિત છે કે મોટા માણસોનો પ્રભાવ વધારે પડતો હોય છે. આથી જો તમે તમારા બાળકને સારું, સંસ્કારી અને સમજદાર બનાવવા ઇચ્છતાં હો, તો બાળકને એ સમજાવો કે તેમના મિત્રો કેવા હોવા જોઇએ? એવા બાળકોથી તમારા સંતાનને દૂર રાખો જેમની બાળક પર ખરાબ અસર થઇ શકે એમ હોય.

આમ કરીને તમે તમારા બાળકને કુસંગતમાં આગળ વધતાં અટકાવી શકો છો, તેમને સારા-ખોટાની સમજણ આપી શકો છો. બાળકને ‘એ જેવું છે, સારું છે’ એમ કહીને એના આત્મવિશ્વાસમાં વધારો કરી શકો છો. બાળક સાથે તમારા સંબંધ પણ મિત્ર જેવા રાખો જેથી એ પોતાની કોઇ પણ વાત તમને વિનાસંકોચે જણાવી શકે. તેમને શિસ્તમાં રહેતાં અને વડીલો તથા શિક્ષકોને માન આપતાં શીખવો.