આહ નહીં, આહા!!

 

યોગના કેટલાક આસન શરીરને સ્ફૂર્તિલું રાખવા સાથે રોગ પણ દૂર કરી શકે છે.

ગયા અંકમાં આપણે નટરાજાસન વિશે જાણ્યું. આ વખતે જાણીએ શલ્ભાસન વિશે. શલ્ભાસન બે રીતે કરવામાં આવે છે - અર્ધશલ્ભાસન અને શલ્ભાસન. આ બંને આસન એકબીજાના પૂરક હોવાથી બંને કરવાથી બમણો લાભ થઇ શકે છે. અલબત્ત, શરૂઆતમાં આ આસન કરવાનું થોડું મુશ્કેલ લાગે. તે માટે પ્રારંભમાં અર્ધશલ્ભાસન કરો અને થોડા દિવસ બાદ જ્યારે ટેવ પડે ત્યારે શલ્ભાસન કરવાનો પ્રયત્ન કરો.

અર્ધશલ્ભાસન
આ આસન કરવા માટે જમીન પર શેતરંજી પાથરી ઊંધા સૂઇ જાવ. બંને હાથની મુઠ્ઠી વાળી બંને જાંઘની વચ્ચે રાખો. હવે શ્વાસ અંદર લેતાં ડાબા પગને ઊંચો કરો. ગોઠણ વળી ન જાય તેનું ધ્યાન રાખવું. આ સ્થિતિમાં પંદર સેકંડ રહ્યા બાદ ફરી પહેલાંની સ્થિતિમાં આવી જાવ. આ જ ક્રિયા જમણા પગથી કરો. વારાફરતી છ વાર બંને પગ દ્વારા આ ક્રિયા કરો.

શલ્ભાસન
જમીન પર ઊંધા સૂઇ જાવ. બંને હાથની મુઠ્ઠી વાળીને જાંઘની વચ્ચે રાખો. પછી શ્વાસ અંદર લેતાં બંને પગ એક્સાથે (ગોઠણ વળે નહીં તે રીતે) ઊંચા કરો. આ સ્થિતિમાં દસ સેકન્ડ રહ્યા પછી ઉચ્છવાસ બહાર કાઢતાં અગાઉની સ્થિતિમાં આવી જાવ. આ આસન ત્રણથી ચાર વાર કરો.

બંને આસનના ફાયદા
- સાઇટિકાનો દુખાવો દૂર કરવામાં મદદરૂપ થાય છે.
- પગની પિંડીની નસને મજબૂત કરે છે. જો રાતે સૂતી વખતે પગની નસ ચડી જતી હોય તો આ આસનો કરવાથી સમસ્યા હલ થઇ જશે.
- કમર મજબૂત અને લચકીલી બને છે.
- દિવસભર કામમાં રત રહેતી ગૃહિણીઓ અને સતત કોમ્પ્યુટર પર કામ કરનારા લોકો માટે આ આસન ઉપયોગી છે.
- સવૉઇકલની સારવારમાં ઉપયોગી છે.