હોમ લોન લેતા પહેલા આ ખાસ વાંચી લેજો

 

-20-70 લાખ રૂપિયાના મકાન ખરીદનારાઓને થશે વધુ અસર
- છેલ્લે ડિસેમ્બર 2010માં આરબીઆઇએ હોમ લોનની માર્ગદર્શિકાઓ જાહેર કરી હતી

રિઝર્વ બેન્ક ઓફ ઇન્ડિયાએ હોમલોન માટે નવી ગાઇડલાઇન જારી કરી છે જેનો અમલ તુરંતની અસરથી થશે. આરબીઆઇએ બેન્કોને કહ્યું છે કે તેઓ હોમલોન આપતી વખતે મકાનની કિંમતમાં સ્ટેમ્પ ડ્યુટી, રજિસ્ટ્રેશન અને અન્ય બીજા ખર્ચાઓને સામેલ ન કરે. તેઓ ફક્ત મકાનની વાસ્તવિક કિંમતને આધાર બનાવીને જ હોમ લોન આપે.


ખરીદનાર પર શું પડશે અસર

તેનો મતલબ છે કે હવે હોમ લોન લેનારા ગ્રાહકોએ મકાન ખરીદતા સમયે વધુ પૈસા પોતાના ખિસ્સામાંથી કાઢવા પડશે કેમ કે બેન્ક હવે વધારાના ખર્ચા માટે લોન નહીં આપે. આરબીઆઇએ જણાવ્યા અનુસાર પ્રોપર્ટીની કિંમતમાંથી અલગ ખર્ચા લોનમાં સામેલ કરવા જોઇએ નહીં કેમ કે આ પ્રોપર્ટીનો હીસ્સો નથી. જાણકારોના મતે આ નિર્ણયથી 20-70 લાખ રૂપિયાના મકાનોના વેચાણ પર અસર પડી શકે છે. આ મકાનો મધ્યમવર્ગની પહોંચમાં હોય છે અને આ નિર્ણયની સૌથી વધુ અસર પણ તેમના પર જ પડશે.


શું કહ્યું હતું 2010માં આરબીઆઇએ

ઉલ્લેખનીય છે કે ડિસેમ્બર 2010માં પણ આરબીઆઇએ હોમલોન માટે નવી ગાઇડલાઇન ઇશ્યુ કરી હતી જે અનુસાર 20 લાખથી વધુ કિંમતના મકાનો પર બેન્ક તેની બજાર કિંમતના ફક્ત 80 ટકા જ લોન આપશે જ્યારે 20 લાખથી ઓછી કિંમતના મકાનો પર બેન્ક તેની કિંમતના 90 ટકાથી વધુ લોન નહીં આપી શકે.