ફલેક્સસીડ્સથી રહો ફિટ અને ફાઇન

 

ફ્લેકસસીડ્સમાં ખૂબ જ ન્યૂટ્રિશન આવેલાં છે. તેમાં ઓમેગા - ૩ ફેટી એસિડ પુષ્કળ પ્રમાણમાં મળે છે, જે કોલેસ્ટેરોલને ઓછું રાખવામાં મદદરૂપ થાય છે. વળી, તેમાં ફાઇબર્સ પણ ઘણા પ્રમાણમાં મળે છે. તેમાં કાર્બોહાઇડ્રેટ્સ ખૂબ જ ઓછા પ્રમાણમાં હોવાથી સ્ટાર્ચ અને ખાંડ ઓછી વાપરતાં લોકો માટે કામનાં છે. ઉપરાંત, તેમાં વિટામિન બી, મેગ્નેશિયમ અને મેંગેનિઝ વિપુલ પ્રમાણમાં મળે છે.

ફ્લેકસસીડ્સમાં ઓમેગા-૩ ભરપૂર પ્રમાણમાં છે
આપણા શરીરમાં આવતા સોજાને કાબુમાં રાખવા માટે ઓમેગા-૩ ફેટી એસિડ ખૂબ જ જરૂરી છે. આપણા શરીરમાં આવતા સોજા ઘણાબધા રોગોને લીધે હોઇ શકે છે. જેમ કે, હૃદય સંબંધિત રોગો, આર્થરાઇટિસ, ડાયાબીટિસ અને અમુક પ્રકારના કેન્સર પણ ખૂબ જ ઓછા પ્રમાણમાં ઓમેગા-૩ લેવામાં આવે ત્યારે ફ્લેકસસીડ્સ લઇને તેની ખામી દૂર કરી શકાય છે.

ફ્લેકસસીડ્સમાં ફાઇબર્સ ખૂબ જ છે
ફ્લેકસમાં ફાઇબર્સ વિપુલ પ્રમાણમાં છે. જે કોલેસ્ટેરોલને ઓછું રાખવામાં ખૂબ જ મદદરૂપ છે. રોજિંદા ખોરાકમાં વધુ ફાઇબર્સ લેવાથી ડાયાબીટિસ તેમ જ કબજિયાત જેવા રોગોમાં પણ ખૂબ જ ફાયદો થાય છે.

તેમાં ફાયટોકેમિકલ્સ ખૂબ જ છે
ફ્લેકસસીડ્સમાં ફાયટોકેમિકલ્સ ખૂબ જ છે, જે કદાચ લીગ્નનો સૌથી સારો સ્ત્રોત છે. જે આંતરડાંમાં ફીમેલ હોર્મોન્સને બેલેન્સ કરે છે. એવા પુરાવા મળ્યા છે કે આ લીગ્નન સ્ત્રીઓમાં ફર્ટિલિટીના પ્રોબ્લેમને દૂર કરે છે. મેનોપોઝ દરમિયાન સ્ત્રીઓને મદદરૂપ થાય છે. ઉપરાંત, બ્રેસ્ટ કેન્સરને દૂર રાખવામાં સહાયક થાય છે. તે ઉપરાંત, લીગ્નનથી ટાઇપ-૨ ડાયાબીટિસ પણ રોકી શકાય છે.

ફ્લેકસસીડ્સ કેવી રીતે લેવાય?

- બને ત્યાં સુધી ફ્લેકસસીડ્સને થોડા ખાંડીને અથવા અધકચરા ક્રશ કરીને વાપરવા.

- ઘણી વખત ફ્લેકસસીડ્સ મુખવાસ તરીકે વાપરવામાં આવે છે. આવા સમયે એ ચકાસો કે મુખવાસ બનાવવા માટે વધુ પડતા તેલનો ઉપયોગ થયો નથી ને? ઉપરાંત, વધુ પડતા મીઠાવાળા ફ્લેકસસીડ્સ લેવાથી બકરું કાઢતાં ઊંટ પેસે છે એ યાદ રાખશો. મુખવાસ તરીકે ફ્લેકસસીડ્સ ખાવા માટે બને ત્યાં સુધી ઘરે જ તે બનાવો. કોરા શેકો (તેલ વગર) અને મીઠું ઓછું નાખો. શક્ય હોય તો ન જ નાખવું. (લીંબુમાં ૩થી ૪ કલાક પલાળી ઓવનમાં ડશિમાં પાથરી ૩૫૦ ફેરનહિટ ડિગ્રી પર બેક કરો.)

- અત્યારે જુદી જુદી વસ્તુઓ માર્કેટમાં ફ્લેકસસીડ્સવાળી મળે છે. જેમ કે, બ્રેડ, સીરીયલ વગેરે વાપરીને ફ્લેકસસીડ્સના લાભ મેળવી શકાય છે.

- ઝીણા દળેલા ફ્લેકસસીડ્સ તમારા સીરીયલ, સલાડ, દહીં વગેરે પર ભભરાવીને વાપરી શકાય છે.

- ઘરે બનાવેલી કેક, મિફન્સમાં ઇંડાના સ્થાને ફ્લેકસસીડ્સનો લોટ વાપરી શકાય છે.

- ફ્લેકસસીડ્સમાં વધારે પ્રમાણમાં ફાઇબર્સ હોવાથી તેને ઓછી માત્રામાં લેવા જોઇએ.