સરળ અને સસ્તું હર્બલ ફેશિયલ

 

ફેશિયલથી ત્વચા સ્વચ્છ અને સુંદર બને છે. તે સાથે ઉંમર કરતાં વહેલી પડતી કરચલીઓમાંથી પણ મુક્તિ મળે છે. હર્બલ ફેશિયલ એવું હોય છે, જેમાં કોઇ પણ કેમિકલનો ઉપયોગ કરવામાં આવતો નથી. તમે ઇચ્છો તો ઘરે પણ હર્બલ ફેશિયલ કરી શકો છો.

હર્બલ ફેશિયલમાં સૌપ્રથમ કલીન્ઝિંગ કરવામાં આવે છે. આ માટે એક ચમચો ચોખાનો લોટ લઇ તેમાં દહીં ભેળવી પેસ્ટ બનાવો. આ પેસ્ટને ચહેરા તથા ગરદન પર હળવા હાથે સારી રીતે ઘસો. તે પછી ચહેરો ધોઇને ટુવાલથી થપથપાવીને લૂછી નાખો. ત્યાર બાદ કરવામાં આવે છે, મસાજ. મસાજ કરવા માટે મલાઇમાં થોડા ટીપાં બદામનું તેલ ભેળવો. આનાથી ચહેરા પર નીચેથી ઉપરની તરફ મસાજ કરો. મસાજ કરવાથી લોહીનું પરિભમણ વધે છે અને ત્વચા રિલેકસ થાય છે. ત્યાર બાદ આંગળીના ટેરવાંથી ચહેરાને થપથપાવો.

મસાજ બાદ ચહેરા પર સ્ટીમ લો. એક તપેલીમાં પાણી ગરમ કરી તેમાં લીમડો નાખો. માથા પર ટુવાલ ઓઢી ચહેરા પર આ પાણીથી સ્ટીમ લો. બ્લેકહેડ રિમૂવરની મદદથી બ્લેકહેડ્સ દૂર કરો. પછી ટુવાલથી ચહેરો લૂછી ફેસપેક લગાવો. તમારી ત્વચાના પ્રકારને અનુરૂપ ફેસપેક લગાવો. જો તમારી ત્વચા તૈલી હોય તો બે ચમચા મુલતાની માટીમાં અડધી ચમચી મધ અને ગુલાબજળ ભેળવીને લગાવો. નોર્મલ ત્વચા હોય તો એક ચમચા નારંગીની છાલના પાઉડરમાં ગુલાબજળ ભેળવીને આ ફેસપેક લગાવો. શુષ્ક ત્વચા હોય તો બે ચમચા મસુરની દાળના લોટમાં થોડું ઓલિવ ઓઇલ અને ગિ્લસરીન મિકસ કરીને લગાવો. હવે તમારો ચહેરો જુઓ, કેવો દમકી ઊઠ્યો છે.