ઉનાળામાં ઘરને રાખો ઠંડકભર્યું

 

ઉનાળાના આગમન સાથે ઘરમાં ઠંડક કેવી રીતે મેળવવી તેના પ્રયત્નો શરૂ થઇ જાય છે. તે અંગે કેટલીક ટિપ્સ...

માર્ચ મહિનો પૂરો થવાને થોડા જ દિવસો બાકી છે. હવે ગરમી શરૂ થશે એટલે ઘરમાં એરકૂલર કે એસી ન હોય તો કેવી રીતે ઠંડક મેળવવી તે સમસ્યા પરેશાન કરી મૂકે છે. સ્વાભાવિક છે કે એસી કંઇ દરેકને પોસાય નહીં, ત્યારે ઘરમાં કઇ રીતે સજાવટ કરવી કે ઠંડક લાગે? ચાલો જાણીએ, તે અંગે કેટલીક ટિપ્સ.

- ઉનાળામાં ઘરની દીવાલોનો રંગ બને ત્યાં સુધી આછો રાખવો જેથી ગરમીમાં પણ ઠંડકનો અનુભવ થાય. ગુલાબી, સફેદ, લીલો, આછો પીળો વગેરે જેવા રંગ દ્વારા તમે ઘરમાં ઠંડક મેળવી શકો છો.

- જો ઘરમાં બારી-બારણાંનાં પડદાનો રંગ લાલ, બ્લ્યૂ, પીળો વગેરે જેવો હોય તો તેના બદલે પેસ્ટલ રંગ જેવા કે, સફેદ, ઓફવ્હાઇટ, મિંટ ગ્રીન, લાઇટ બ્રાઉન કલરના પડદા લગાવો. પડદાનું કાપડ એટલું જાડું ન હોવું જોઇએ કે તેમાંથી હવાની અવરજવર ન થઇ શકે.

- તમે ઇચ્છો તો ઘરમાં ડબલ પડદા પણ લગાવી શકો છો. નેટના સુંદર બારીક પડદાની સાથે જયોર્જટના પડદા લગાવો. આનાથી ઘરના લુકમાં પરિવર્તન આવવાની સાથે રૂમમાં હવાની પણ સારી રીતે અવરજવર થઇ શકશે.

- ઉનાળામાં આછા રંગની બેડશીટ પાથરો. આનાથી રૂમમાં ઠંડક લાગવાની સાથે ઊંઘ સારી રીતે આવે છે.

- શક્ય હોય તો લાકડા કે રેકઝીનના સોફાને બદલે વાંસના બનેલા સોફા (કેનનું ફર્નિચર) અને હળવું ફર્નિચર રાખવું જોઇએ.

- ઘરમાં પીળા, લાલ રંગના બલ્બ ન લગાવો. એથી ગરમી વધુ થાય છે અને ઠંડકનો અનુભવ થતો નથી.