પેટ-માથામાં દુખાવો થાય તો ‘૧૦૪’ પર ફોન કરો

આગામી બે મહિનામાં સેવા શરૂ થશે
૧૦૮ની વધુ ૫૦ એમ્બ્યુલન્સ મુકાશે : આરોગ્યમંત્રી વ્યાસ

ઇમરજન્સી કેસમાં લોકોને તાત્કાલિક સારવાર આપતી એમ્બ્યુલન્સ ‘૧૦૮’ જીવાદોરી સમાન સાબિત થઈ છે. હવે પેટમાં  કે માથાના દુખાવા જેવા નોન ઇમરજન્સી કેસમાં વ્યક્તિ ૧૦૪ નંબર ડાયલ કરીને, ડોક્ટર પાસેથી દર્દનું નિદાન અને દવાની માહિતી નિ:શુલ્ક મેળવી શકશે. રાજ્યના આરોગ્યમંત્રી જયનારાયણ વ્યાસે અમદાવાદ ખાતે આ જાહેરાત કરી હતી.

કઠવાડા ખાતે નવા બનેલા ‘૧૦૮’ના સેન્ટરમાં યોજાયેલા એક કાર્યક્રમમાં વ્યાસે જણાવ્યું હતું કે, સામાન્ય રીતે કોઇ વ્યક્તિને પેટ કે માથાનો દુખાવો ઉપડે ત્યારે ગંભીરતા ન હોય પણ દવા અને સલાહ લેવી જરૂરી હોય ત્યારે  વ્યક્તિ ૧૦૪ નંબર ડાયલ કરીને નિષ્ણાત ડોક્ટર પાસેથી સલાહ મેળવી શકશે.

આ સેવા આગામી બે મહિનામાં શરૂ કરવામાં આવશે. ટેલી મેડિસિનના આધારિત આ સેવા દ્વારા ૮૦ ટકા નોન ઇમરજન્સી નિવારી શકાશે. ‘૧૦૪’ નંબર ડાયલ કરવાથી ડોક્ટર દર્દીની તકલીફને સમજીને તેના આધારે દર્દનું નિદાન કરીને ઓવર ધ કાઉન્ટર (ઓટીસી- પ્રિસ્કિ્રપ્શન વગર) મળતી દવા લખી આપશે. જેને પગલે હવે દર્દીને ડોક્ટરની સલાહ માટેની ફી અને સમયનો બચાવ થશે.

નવા વર્ષમાં મધર-ચાઇલ્ડ ટ્રેકિંગ સિસ્ટમ

વર્ષ-૨૦૧૧ના અંત સુધીમાં સમગ્ર રાજ્યને ‘મધર-ચાઇલ્ડ ટ્રેકિંગ’ સિસ્ટમ હેઠળ આવરી લેવાશે તેમ આરોગ્યમંત્રી જયનારાયણ વ્યાસે જણાવ્યું હતું. આ સિસ્ટમથી  રાજ્યની સગભૉ માતાથી માંડીને ચાર વર્ષ સુધીનાં બાળકનો તમામ ડેટા કમ્પ્યૂટરમાં ઓનલાઇન ઉપલબ્ધ કરાશે. જેનાથી સગભૉ માતાની ડિલિવરી પહેલાં અને પછીની સારવાર, બાળકને રસી આપવા જેવી મેડિકલ અને પેરામેડિકલ સેવા પૂરી પાડવા આગોતરું આયોજન કરાશે.