રાજ્યમાં SP માટે હવે બે વર્ષની ટ્રેનિંગ ફરજીયાત

- પોલીસ ટ્રેનર એકેડેમી ઉપરાંત રાજ્યમાં ટ્રેનિંગ લીધા પછી નિમણુંક
- હોદ્દો સ્વીકારતા પહેલાં આધુનિક ટેકનોલોજીના પાઠ ભણવા પડશે
- નક્સલવાદ, આતંકવાદ તેમજ સાયબર ક્રાઇમે પોલીસનો બોજ વધાર્યો

પોલીસની નોકરીમાં જોડાવા માટે હવે પરીક્ષામાં પાસ થવું માત્ર જરૂરી નથી પણ તાલીમ લેવી અગત્યની બની ગઇ છે. કેન્દ્રના આદેશને પગલે હવે જિલ્લામાં ફરજ ઉપર મૂકવામાં આવતા સુપ્રિટેન્ડેન્ટ ઓફ પોલીસ માટે બે વર્ષનો તાલીમ પિરીયડ નક્કી કરવામાં આવ્યો છે.

સામાન્યરીતે આઇપીએસ અધિકારી હોય તેમને એસપીનો હોદ્દો આપવામાં આવે છે. પહેલાં એક વર્ષની તાલીમ લઇને નવા એસપીને પોસ્ટિંગ આપવામાં આવતું હતું. ભારતીય પોલીસ દ્વારા ૧૮૬૧ થી અત્યાર સુધીમાં એસપી રેન્કના અધિકારીઓને એક વર્ષની તાલીમ આપવાની જોગવાઇ કરવામાં આવી હતી. તે સમયે વર્તમાન સમય જેવા ગુનાઓ બનતા ન હતા તેથી તાલીમ પિરીયડ મયાર્દા તે પ્રમાણે નક્કી કરવામાં આવી હતી.

હવે દેશમાં નકસલવાદ અને ત્રાસવાદનો ફેલાવો વધી રહ્યો છે. પૂર્વોત્ત્તર રાજ્યોમાં પોલીસ ઉપર હુમલા કરવાના બનાવો વધી ગયા છે. નકસલવાદી અને આતંકવાદી પ્રવૃત્તિઓને ધ્યાને લઇને એસપી માટે કેન્દ્રએ બે વર્ષની તાલીમ ફરજીયાત બનાવી છે અને દેશના તમામ રાજ્યોના રિસર્ચ બ્યુરોએ આ પ્રકારના આદેશને મંજુરી આપી દીધી છે.

ત્રાસવાદી હુમલા કે પ્રવૃત્તિ સામે કેવીરીતે પ્રતિકાર કરવો, નકસલવાદને ડામવા શું કરવું, સાયબર ક્રાઇમના વધતા જતા ગુનાઓ સામે લોકોને કેવા પ્રકારનું અને કેવું રક્ષણ આપવું, કાયદો અને વ્યવસ્થાની જાળવણી માટે કઇ નવી બાબતોનું ધ્યાન રાખવું આ તમામ પ્રશ્નોનો ઉકેલ તાલીમમાં આવી જાય છે. એસપી કક્ષાના અધિકારીઓને આધુનિક ટેકનોલોજીના પાઠ ભણાવવાની આવશ્યકતા જણાતી હોવાથી આ નિર્ણય કરવામાં આવ્યો છે.

એસપી બનનારા પોલીસ અધિકારીને મધ્યપ્રદેશ સ્થિત ભોપાલમાં એક વર્ષની તાલીમ અપાશે. આ માટે ખાસ એકેડેમી બનાવવામાં આવી રહી છે. કેન્દ્રીય આયોજન પંચે એકેડેમી માટે ૭૪ કરોડનું બજેટ ફાળવ્યું છે અને તેને ૨૦૧૨માં શરૂ કરવાનો આદેશ આપ્યો છે. આ સેન્ટરમાં એક વર્ષમાં ૧૫૦૦ એસપીને તાલીમ આપવામાં આવશે. નવ નિયુકત એસપીએ જે તે રાજ્યમાં પણ એક વર્ષની તાલીમ લેવાની રહેશે.