NRGમાં વધી રહેલો અન્નપૂર્ણા વ્રતનો ક્રેઝ

શુક્રવારે વ્રતની પૂર્ણાહુતિ નિમિત્તે માતાજી મંદિરે એન.આર.જી. દર્શન કરવા આવશે

મંદિરમાં અન્નકૂટ ધરાવાશે

માતાજીને વિશિષ્ટ શણગાર થશ

માત્ર ગુજરાતમાં જ નહીં અન્નપૂર્ણા માતાજીનાં વ્રતનો મહિમા દરિયાપાર પહોંચ્યો છે. એટલે કે મોટી સંખ્યામાં વિદેશમાં રહેતા ગુજરાતીઓ અન્નપૂર્ણા માતાજીનું વ્રત કરે છે અને માતાજીનાં દર્શન કરવા ખાસ ગુજરાત આવે છે. આવા જ કેટલાક એન.આર.જી. તા.૩૧મી ડિસેમ્બરના રોજ અન્નપૂર્ણા વ્રતની પૂર્ણાહુતિ નિમિત્તે અમદાવાદમાં રાયપુર દરવાજા અંદર આવેલા પીપરડીની પોળ ખાતેના લગભગ સવા સો વર્ષ પ્રાચીન અન્નપૂર્ણા માતાજીનાં દર્શન કરવા આવશે.

આ અન્નપૂર્ણા મંદિરમાં ૩૦ વર્ષથી સેવા આપતા વ્રજેશભાઇ ભટ્ટે જણાવ્યું કે દિન-પ્રતિદિન વિદેશ વસતાં ગુજરાતીઓમાં અન્નપૂર્ણા માતાજીના વ્રતનો મહિમા વધી રહ્યો છે. એવા પણ કેટલાક પરિવારો છે, જેઓ દર વર્ષે વ્રત નિમિત્તે માતાજીના દર્શન કરવા વિદેશથી ખાસ અમદાવાદ અમદાવાદ આવે છે. આ વર્ષે પણ શુક્રવારે ચારથી પાંચ એન.આર.જી. કુટુંબો માતાજીનાં દર્શન કરવા આવશે.

તેમણે કહ્યું કે અન્નપૂર્ણા માતાજીના વ્રતની સમાપ્તિ શુક્રવારે થશે. આ નિમિત્તે મંદિરમાં સવારે ૪ વાગ્યે બંધબારણે કેશર-સ્નાન ત્યારબાદ સવારે૭થી ૭.૩૦માં આરતી દરમિયાન દર્શન ખુલશે. પછી બપોરે ૩ વાગ્યા સુધી દર્શન બંધ રહેશે. બપોરે ૩થી રાત્રે ૯ સુધી અન્નકૂટનાં દર્શન થશે. આ સમયે માતાજીને વિશિષ્ટ શણગાર પણ થશે. જ્યારે રાત્રે ૯થી ૧૦ પુન: મંદિર બંધ રહેશે અને ત્યારબાદ રાબેતા મુજબ દર્શન થઇ શકશે.

તેમણે જણાવ્યું કે આ મંદિરે અન્નપૂર્ણા માતાજીનાં વ્રત દરમિયાન મોટી સંખ્યામાં લોકો દર્શનાર્થે આવે છે. અમદાવાદ ઉપરાંત આજુ-બાજુનાં શહેરો અને ગામમાંથી પણ લોકો અહીં દર્શન કરવા આવે છે. આ વર્ષે વ્રતનાં દિવસો દરમિયાન દોઢ લાખ લોકોએ મંદિરની મુલાકાત લીધી છે.

વ્રતનાં દોરો મંદિર દ્વારા નિ:શુલ્ક અમેરિકા, લંડન સહિત વિદેશમાં મોકલવામાં આવ્યા

અન્નપૂર્ણા માતાજીના વ્રતમાં સફેદ દોરાની ગાંઠ વાળવામાં આવે છે. આ માટે વિદેશમાં આ વ્રત કરતાં શ્રદ્ધાળુઓને મંદિર દ્વારા નિ:શુલ્ક મોકલવામાં આવે છે. આ વર્ષે ૫૦૦ દોરા અમેરિકા, લંડન, સાઉથ આફ્રિકા અને ઓસ્ટ્રેલિયા મોકલવામાં આવ્યા છે, એમ તેમણે ઉમેર્યું હતું.