અમેરિકા વિરુદ્ધ પાક.-અફઘાન સીમા પર એક થયા આંતકીઓ

*અલગ-અલગ જુથોના આતંકીઓ નાટો સૈન્ય સામે લડવા એક થયા
*લશ્કર-એ-તોઈબા અને તાલિબાન પણ એક બીજાને મદ કરે છે

અફઘાનિસ્તાન અને પાકિસ્તાન સીમા પર સક્રિય અલગ-અલગ આતંકી જુથો અમેરિકા અને નાટો સેના વિરુદ્ધ એક થઈ રહ્યા છે. આ આતંકીઓએ ફરી એક વખત આ વિસ્તારમાં પોતાનો દબદબો સ્થાપવાના પ્રયાસો શરૂ કરી દીધા છે.

આ વિસ્તારમાં મુલ્લા મોહમ્મદ ઉમર, હક્કાની નેટવર્ક અને હિકમતયારના આંતકી જુથો સક્રિય છે, પરંતુ હવે તેમની વચ્ચે સહયોગ વધી રહ્યો છે. અફઘાનિસ્તાન અને પાકિસ્તાનમાં સક્રિય લશ્કર-એ-તોઈબા અને તહરીક-એ-તાલિબાના પણ એક બીજાને મદદ કરી રહ્યા છે.

અફઘાનિસ્તાન અને પાકિસ્તાનની સીમા આતંકવાદીઓ માટે આશ્રયસ્થાન માનવામાં આવે છે, પરંતુ અહીં સક્રિય આતંકીઓ અલગ-અલગ જુથોમાં વહેંચાયેલા છે. અનેક વખત આ જુથો અંદરો અંદર લડે છે.

હવે આ ક્ષેત્રમાં નાટોના વધી રહેલા દબાણને કારણે આતંકી જુથો એક થઈ રહ્યા છે. હાલમાં જ આતંકીઓએ નાટો સેનાના પૂર્વ અફઘાનિસ્તાન કેમ્પ પર હુમલો કર્યો હતો. નાટો સૈન્યની જવાબી કાર્યવાહીમાં અમુક આતંકીઓ માર્યા ગયા હતાં. તપાસ કરતા માલુમ પડ્યું હતું કે માર્યા ગયેલા આતંકીઓ ત્રણ અલગ-અલગ જુથના હતાં.

નાટો સેના, ખાસ કરીને અમેરિકન કમાન્ડર અફઘાનિસ્તાનની સીમાથી નીકળીને પાકિસ્તાનની સીમાના આતંકવાદીઓને નિશાન બનાવી રહ્યા છે. તેને રોકવા માટે જુદા જુદા આતંકી જુથોના જવાનો સીમા પર એક થઈ રહ્યા છે. એક નાટો અધિકારીના જણાવ્યા પ્રમાણે આ ચિંતાની વાત છે કે આતંકી જુથો એક થઈ રહ્યા છે. અધિકારીએ દાવો કર્યો છે કે હવે અમેરિકા તેમજે નાટ સૈન્ય પાકિસ્તાનની સીમા પર આવેલા આતંકી કેમ્પો પર હુમલા કરી રહ્યું છે, જેનાથી આતંકીઓ પણ દબાણ ખૂબ વધી ગયું છે.