સેહવાગ દ.આફ્રિકા સામેની વન ડે શ્રેણીમાંથી બહાર

- ખભામાં ઈજાના કારણે સેહવાગને આરામ કરવાની સલાહ

- વીરૂના સ્થાને મુરલી વિજય કે રોહિત શર્માને ટીમમાં સમાવાશે

- ઈજાના કારણે વીરૂને મેમાં ટી20 વર્લ્ડકપમાં ગુમાવવો પડ્યો હતો

દક્ષિણ આફ્રિકા સામે રમાનારી ટેસ્ટ શ્રેણી પહેલા ટીમ ઈન્ડિયાને સૌથી મોટો ફટકો પડ્યો છે. ઈજાના કારણે વિસ્ફોટક ઓપનર વિરેન્દ્ર સેહવાગ વન ડે શ્રેણીની બહાર થઈ ગયો છે.

ખભામાં ઈજા થઈ હોવાના કારણે સેહવાગને જાન્યુઆરીમાં રમાનારી વન ડે શ્રેણીમાંથી હટી જવાની સલાહ આપવામાં આવી છે. સેહવાગના સ્થાને રોહિત શર્માને ટીમમાં સમાવવામાં આવે તેવી શક્યતા છે.

બીસીસીઆઈના એક નિવેદનમાં જણાવાયું છે કે સેહવાગના ખભામાં ઈજા થઈ હોવાના કારણે તેને દક્ષિણ આફ્રિકા સામેની વન ડે શ્રેણીમાં નહીં રમવાની સલાહ આપવામાં આવી છે. સેહવાગના સ્થાને રોહિત શર્માને ટીમમાં સ્થાન આપવામાં આવી શકે છે.

બોર્ડ સેક્રેકટરી એન.શ્રીનિવાસને ઉમેર્યુ હતું કે મુરલી વિજયને પણ વન ડે શ્રેણી માટે દક્ષિણ આફ્રિકામાં રહેવાની સલાહ આપવામાં આવી છે.

ઉલ્લેખનીય છે કે ખભાની ઈજાના કારણે 32 વર્ષિય આક્રમક ઓપનરને મેમાં યોજાયેલા આઈસીસી ટી20 વર્લ્ડકપમાંથી બહાર થઈ જવાની ફરજ પડી હતી.