સિટી બેંક કૌભાંડ : મુખ્ય આરોપી શિવરાજ પુરીની ધરપકડ

સિટી બેંકની ગુડગાંવ બ્રાંચમાંથી રૂપિયા 250 કરોડ ખંખેરી લેનારા મુખ્ય ભેજાબાજ શિવરાજ પુરીની પોલીસે ધરપકડ કરી હતી. બાદમાં પોલીસે પુરીને ગુડગાંવ ડિસ્ક્ટ્રીક્ટ કોર્ટમાં હાજર કર્યો હતો. શિવરાજ પુરીએ કોર્ટ સમક્ષ પોતાને નિર્દોષ ગણાવતા કહ્યું હતું કે મને ન્યાયપાલિકા પર વિશ્વાસ છે અને ટૂંક સમયમાં જ હકીકત બહાર આવી જશે.

32 વર્ષના મૃદુભાષી એવા નવયુવાન શિવરાજ પુરીને પહેલી નજરે જોતા કોઈ કહી જ ન શકે કે તેણે આટલુ મોટુ કૌભાંડ આચર્યું હશે. પરંતુ સિટી બેંકના સ્ક્વોયર બિલ્ડિંગના આસિસ્ટંટ વાઈસ પ્રેસિડેન્ટ બીનૂ સોમનની ફરિયાદના આધારે બેંકના રિલેશનશિપ મેનેજર શિવરાજ પુરી, તેમની માતા દીક્ષા પુરી, નાના પ્રેમનાથ અને નાશી શીલા દેવી વિરૂદ્ધ છેતરપીંડિ તથા ષડયંત્ર રચવાનો કેસ દાખલ કરવામાં આવ્યો હતો.

આ સંદર્ભે એસીપી ડીએલએફ દલવીર સિંહે જણાવ્યું હતું કે છેલ્લા ચાર-પાંચ મહિનાથી કેટલાક સંકાસ્પદોના બેંક ખાતાઓમાં દર મહિને કરોડો રૂપિયાના ટ્રાંજેક્સન થતા હતાં. ત્યાર બાદ હાથ ધરવામાં આવેલી તપાસના આધારે આ કૌભાંડનો ખુલાસો થયો હતો.

પોલીસે હાથ ધરેલી તપાસમાં એક મહત્વનો પ્રશ્ન એ ઉભો થાય છે કે ખાનગી બેંકોમાં વર્ષમાં બે વાર ઓડિટ કરવાં આવતી હોવા છતાં ઘણા સમયથી ચાલી આવી રહેલા આ કૌભાંડથી બેંક અધિકારીઓ અજાણ્યા કેવી રીતે રહી શકે? તેથી આ કેસમાં બેંકના અન્ય અધિકારીઓની આરોપી રિલેશનશીપ મેનેજર પુરી સાથે મિલીભગત હોઈ શકે છે. આ કેસમાં બેંકના અન્ય અધિકારીઓ પણ શંકાના ઘેરામાં આવી શકે છે.