ઉત્તર કોરિયાને આંચ આવશે તો ચીન ધમાલ મચાવી દેશે!

-ક્ષેત્રિય વિવાદોને નજર-અંદાજ કરી શકાય નહીં

-ચીનનું સૈન્ય કોઈ પણ પરિસ્થિતિ સામે લડવા તૈયાર

-ઉત્તર અને દક્ષિણ કોરિયાના વિવાદ પર ચીનની નજર 

ઉત્તર અને દક્ષિણ કોરિયા વચ્ચે તણાવ ચાલી રહ્યો છે ત્યારે ચીને કહ્યું છે કે ક્ષેત્રીય વિવાદોને નજરઅંદાજ કરી શકાય નહીં તેમજ તેના 23 લાખ સૈનિકો કોઈ પણ પરિસ્થિતિ સામે લડવા માટે સંપૂર્ણ તૈયાર છે. ચીનના રક્ષા મંત્રી જનરલ લિયાંગ ગુઆંગલીએ કહ્યું હતું કે ચીન એક રાષ્ટ્રીય અને વેશ્વિક શક્તિના રૂપમાં ઉભરી આવ્યું હોવા છતાં આતંરરાષ્ટ્રીય સ્તરે સ્થિતિ ખૂબ જ જટિલ બની છે.

સરકારી સમાચાર એજન્સી શિન્હુઆને આપેલી મુલાકાતમાં ગુઆંગલીએ કહ્યું હતું કે હાલમાં એવી સ્થિતિ નથી કે કોઈ યુદ્ધમાં પુરા દેશે ભાગ લેવો પડે, પરંતુ આવી કોઈ ઘટના ઘટી શકે છે જેનાથી ક્ષેત્રિય વિવાદ આગળ વધે. આવી સ્થિતિમાં અમે અમારી રાષ્ટ્રીય સંપ્રભુતા અને સુરક્ષાને સૌથી ઉપર રાખવા માગીશું. કોમ્યુનિસ્ટ પાર્ટી ઓફ ચાઈનાનું પણ આવું જ માનવું છે. 

ચીનના રક્ષા મંત્રીએ કહ્યું હતું કે અમારી પાસે 23 લાખ તાલિમ પામેલા સૈનિકો છે, જે અત્યાધુનિક હથિયારોથી સજ્જ છે. કોઈ પણ ક્ષેત્રિય વિવાદ વખતે અમારું સૈન્ય સંપૂર્ણ તૈયાર છે. ક્ષેત્રિય વિવાદોને નજર અંદાજ કરી શકાય નહી. ગુઆંગલીના જણાવ્યા પ્રમાણે દક્ષિણ અને ઉત્તર કોરિયા વચ્ચે ચાલી રહેલા વિવાદ પર ચીન નજર રાખી રહ્યું છે. બેઈજિંગ ઉત્તર કોરિયાનું રણનીતિક ભાગીદાર છે. 

ચીને વાતચીત દ્વારા બંનેને તણાવ ઓછો કરવાની તેમજ વિવાદિત પ્રશ્નોનું સમાધાન લાવવાની સલાહ આપી છે. રક્ષા મંત્રીએ કહ્યું હતું કે એશિયાની પ્રમુખ તાકાત બનીને ઉભરેલું ચીન 30 વર્ષમાં કોઈ યુદ્ધ અથવા મોટા વિવાદમાં સામેલ નથી થયું, પરંતુ આ સમય દરમિયાન પીપલ્સ લિબરેશન આર્મી ખૂબ મજબૂત બની છે. પીપલ્સ લિબરેશન આર્મીની તૈયારી ચાલું છે તેમજ અમે કોઈ પણ પરિસ્થિતિનો સામનો કરવા માટે સંપૂર્ણ તૈયાર છીએ.