પ્રવાસની મજા સજા ન બને તે માટે આટલું કરો

 

પ્રવાસ દરમિયાન ઘણી વાર નાના બાળકો કંટાળી જાય છે, એકલાં પડી જવાથી પ્રવાસની મજા સજા બની જાય છે. આમ ન બને તે માટે આટલું કરો.

પ્રવાસે જઇએ ત્યારે ઘણી વાર મોટી ઉંમરના લોકો તો પોતાની રીતે મોજ માણતાં હોય છે, પણ બાળકો કંટાળી જાય છે. બાળકોને સાથે લઇ પ્રવાસે જાવ, ત્યારે તેમને રસ્તામાં કે તમે જ્યાં ફરવા ગયાં હો ત્યાં સમય સારી રીતે પસાર થાય એનો ખ્યાલ રાખો. ખાસ કરીને જ્યારે તમે બસ, કાર કે ટ્રેન દ્વારા પ્રવાસ કરી રહ્યાં હો, ત્યારે તો બાળકો કંટાળી ન જાય તેનું ધ્યાન રાખવું અત્યંત જરૂરી છે. એ માટે કેટલીક બાબતોની તૈયારી પ્રવાસે જતાં પહેલાં જ કરી લો.

મેજિક બોક્સ : એક બોક્સમાં બાળકોને ગમતાં રમકડાં, ગેમ, પઝલ્સ વગેરે સાથે રાખો. જ્યારે લાગે કે બાળકોને કંટાળો આવી રહ્યો છે, ત્યારે તેમને આ બોક્સ આપો. ગમતી ગેમ, રમકડાં વગેરે મળવાથી તેમનો કંટાળો દૂર થઇ જશે.

પેન્ટિંગ પણ કરી શકાય : બાળકોને ચિત્રકામનો શોખ હોય, તો થોડી સ્કેચ પેન સાથે લઇ લો. તેમને કાગળ પર અથવા જો કાર દ્વારા પ્રવાસ કરી રહ્યાં હો, તો કારના કાચ પર ડ્રોઇંગ કરવા દો. હા, સ્કેચ પેનની ઇન્ક પાકી ન હોવી જોઇએ.

મ્યુઝિક મસ્તી : બાળકોને ગીત-સંગીત પસંદ હોય છે. જ્યારે પેકિંગ કરો ત્યારે તેમને ગમતાં ગીતની સીડી સાથે લઇ લો. આ સાથે રસ્તામાં બધાં મળીને અંતાક્ષરી પણ રમી શકો.

વાર્તાની ઓડિયો સીડી : ઘણા બાળકોને વાર્તા સાંભળવાનું ગમતું હોય છે. આવા બાળકો માટે તમે વાર્તાની સીડી લઇ શકો છો, જે બજારમાં સહેલાઇથી મળી જાય છે. ખાસ કરીને જ્યારે પ્રવાસ લાંબા સમયનો હોય ત્યારે આવી સીડી ખૂબ ઉપયોગી થાય છે.

સ્વાસ્થ્ય : બાળકોના સ્વાસ્થ્ય અને તેમના ખાવાના શોખનો પણ વિચાર કરો. તેમને ભાવતા નાસ્તા પ્રવાસમાં અવશ્ય સાથે રાખો. આ નાસ્તા પૌિષ્ટક હોવા જોઇએ જેથી પ્રવાસ દરમિયાન મસ્તીતોફાન કરે, તો પણ શક્તિ જળવાઇ રહે.

વાતો કરો : પ્રવાસનો સમય જો લાંબો હોય તો રસ્તામાં બાળકો સાથે વાતો કરો, ગીતો ગાવ, અંતાક્ષરી રમો અથવા ઉખાણાં પૂછો. આથી તેઓ કંટાળશે નહીં અને મન આનંદમાં રહેશે.

વધારે સૂવા ન દો : સફર દરમિયાન બાળકોને વધારે પડતાં ઊંઘવા ન દો. વધારે પડતી ઊંઘ તેમના સ્વાસ્થ્ય પર વપિરીત અસર કરી શકે છે.

થોડો બ્રેક લો : જો તમે કાર દ્વારા મુસાફરી કરી રહ્યાં હો, તો વચ્ચે બ્રેક લેતાં રહો. બાળકોને કારમાંથી ઉતારી આસપાસ લટાર મરાવો. જેથી તેઓ તાજગી અનુભવે.

બાળકો માટે જે કંઇ વસ્તુ સાથે લો, તે તેમને પૂછીને ગમતી હોય એ વસ્તુ જ લો. બાળકોની પસંદનો ખાસ ખ્યાલ રાખો જેથી પ્રવાસ તેમના માટે પણ યાદગાર બની રહે.