આવા પ્લાસ્ટિકમાંથી બનેલા રોડ જોયા છે ક્યાંય?

 

પ્લાસ્ટિકની થેલીઓ, તૂટેલી ડોલ અને ચંપલોમાંથી બને છે આ રસ્તો તેનાથી સામાન્ય લોકોને કમાણી મળે છે અને પર્યાવરણનો બચાવ પણ થાય છે
પ્લાસ્ટિકમાંથી બનેલા રસ્તા વિશે કદાચ તમે ક્યાંય નહીં સાંભળ્યુ હોય, પણ હિંદુસ્તાનમાં તમે આની કલ્પના ચોક્કસ કરી શકો છો. બેંગાલુરુના અહમદ ખાને આ વાત સાચી કરી બતાવી છે. તે અત્યાર સુધી 2000 કિલોમીટર કરતા વધારે પ્લાસ્ટિકના રસ્તા બનાવી ચૂક્યા છે.

2002માં પ્લાસ્ટિકના કચરામાંથી બનેલી સડકોનો વિચાર તેમના મગજમાં આવ્યો હતો. આ રસ્તા દ્વારા દરેક પ્રકારના પ્લાસ્ટિકના કચરાનો ઉપયોગ કરી શકાય છે. તેમાં પ્લાસ્ટિકની થેલીઓ, પેકિંગ સામગ્રી, તૂટેલી ડોલ અને પ્લાસ્ટિકના ચંપલો પણ સામેલ છે.

આ રસ્તા સામાન્ય રસ્તા કરતા ઘણા વધારે મજબૂત છે. અહમદનું કહેવું છે તે પ્લાસ્ટિક વાસ્તવમાં અત્યંત ટકાઉ હોય છે અને પાણી તેમજ ગરમીનો માર પણ તે સરળતાથી ઝીલી શકે છે. આ જ કારણે તેમાં રસ્તાના સમારકામનો ખર્ચો બચી શકે છે અને સરકારને ફાયદો થાય છે.

સરકારી આનાકાનીઃ બેંગાલુરુમાં કચરો ભેગો કરવા માટે એક નેટવર્ક તૈયાર કરવામાં આવ્યું છે. સ્કૂલો, એપાર્ટમેન્ટ્સ અને કચરો વીણવાવાળા પાસેથી આઠ રૂપિયા પ્રતિ કિલોના ભાવે પ્લાસ્ટિકનો કચરો ખરીદવામાં આવે છે. તેનાથી સામાન્ય લોકોને કમાણી મળે છે અને પર્યાવરણનો બચાવ પણ થાય છે.