તૈલી ત્વચા હોય તો ચહેરો સાદા પાણીથી ધૂઓ

 

 

પ્રશ્ન :મારી ઉંમર ૩૭ વર્ષ છે. મારી ત્વચા તૈલી છે. મારે કયા ક્રીમથી ફેશિયલ કરાવવું અને કયા ફેશવોશથી ચહેરો ધોવો જોઇએ? હું કેવા કોસ્મેટિક્સનો ઉપયોગ કરું તો વધારે સારું?

ઉત્તર : તમે ચહેરો ધોવા માટે બજારમાં ઓઇલી સ્કિન માટે મળતા ફેશવોશનો ઉપયોગ કરો. દિવસમાં ત્રણ-ચાર વાર ચહેરો સાદા પાણીથી ધૂઓ. ફેશિયલ કરાવતાં પહેલાં તમે બ્યૂટિશિયનને તમારી સ્કિન વિશે જણાવી દેશો તો એ ત્વચાના પ્રકારને અનુરૂપ ફેશિયલ ક્રીમનો ઉપયોગ કરશે. કોસ્મેટિકસમાં તમે વોટરબેઝડ કોસ્મેટિકસ તેમ જ મેટ ફિનિશ ધરાવતાં હોય તેનો ઉપયોગ કરો.

પ્રશ્ન :હું બાવીસ વર્ષની છું. ઋતુ બદલાવાની સાથે જ મારા ચહેરા પર ઝીણી ઝીણી ફોલ્લીઓ થઇ જાય છે. તે દૂર કરવા માટે ઘરગથ્થુ ફેસપેક જણાવશો.

ઉત્તર : તમે જણાવ્યું નથી કે તમારી ત્વચાનો પ્રકાર કેવો છે. જોકે તમારી સમસ્યા પરથી લાગે છે કે ત્વચા અત્યંત સંવેદનશીલ હોવી જોઇએ. તમે તુલસીના થોડા પાન વાટીને તેને જ્યાં ફોલ્લીઓ થઇ હોય ત્યાં લગાવો. ભોજનનું ખાસ ધ્યાન રાખો. તળેલાં ખાદ્યપદાર્થો ઓછા લેવાનું રાખો. તાજાં ફળ ખાવ. છતાં જો ફરક ન જણાય તો ડર્મેટોલોજિસ્ટને બતાવો.

પ્રશ્ન :મારી દીકરી સાત વર્ષની છે. એના ચહેરા અને પીઠ પર ખૂબ જ રુંવાટી છે. એ મોટી થતી જાય છે તેમ તેમ રુંવાટી વધતી જાય છે. એ મોટી થશે ત્યારે તેના ચહેરાની સુંદરતા બગડી જશે તેથી મને ચિંતા થાય છે. આ રુંવાટી દૂર કરવાનો કોઇ ઉપાય છે?

ઉત્તર : તમે દીકરી માટે ઉબટણનો ઉપયોગ કરો. તે માટે એક ચમચો ચણાનો લોટ લઇ તેમાં ચપટી હળદર, અડધી ચમચી મલાઇ અને થોડું કાચું દૂધ ભેળવી પેસ્ટ તૈયાર કરો. આ પેસ્ટને દીકરીના શરીર પર જ્યાં રુંવાટી વધારે હોય ત્યાં હળવા હાથે ઘસો. નિયમિત રીતે આમ કરવાથી ધીરે ધીરે એના શરીર પરની રુંવાટી ઓછી થઇ જશે.